Zanah marboat duty mumal awm loh vangin Khualzin an tangkhang ṭhin

Mamit district leh Ko-lasib district inkalpawhna kawngpui pawimawha Bairabi Tlawng kaiah mar-boat a service ṭhin a, marboat service-ah hian zan lamah duty mumal siam a nih loh avangin mipuiin harsatna tâwk ṭhin.

Thu dawn danin, Bairabi Tlawng kaia marboat service hi PWD enkawl a ni a, chhun lamah duty mumal taka an awm laiin, zan lamah duty an awm mumal lo.

Khualzinte'n duty an koh pawhin kal duh loh chang an nei a, an hnathawh hun chhung a nih tawh loh chhuahlamah hmangin duty-te'n kal duh loh cháng an neih ṭhin avangin khualzinte'n harsatna an tawk a, an tangkhang ṭhin a ni.

Zana marboat-a duty an awm cháng pawhin chhun lama car pakhata Rs. 50 chawina ṭhinah Rs. 200 te, 207 pick-up atan chhun lama Rs. 80 ni ṭhin chu zanah Rs. 400 te an phût ṭhin. Lawnglênga chuan man chhunah mi pakhat tan Rs. 10 a nih laiin, zanah chuan Rs. 30 a ni
ṭhin tih an sawi bawk.

Bairabi Tlawngah hian hun eng emaw chen marboat service tihtawp a nih hnuah November 22, 2016 aṭangin a service leh ṭan a ni.