Ṭhalfavang Kût, 2016 a Ṭiak

December 15, 2016-a hman ṭan Ṭhalfavang Kût, 2016 chu Inrinni khan a ṭiak a; a tawp ni-ah hian Assembly deputy speaker R Lalrinawma'n a hmanpui. R Lalrinawma chuan, ram leh hnam changkangin ṭhalaite leh mi náwlpui hlimna ngai pawimawhin intihhlimna an uar nia sawiin, "Hlimna hi rilru leh tisa lamah hnam hriselna atan a pawimawh. Kût hi mi tin huap intihhlimna, talent chi hrang hrang phochhuahna mai bakah, ram chhung leh páwn aṭanga khualzin mite kaltlanga ei leh bar zawn kawngah ram tan hlâwkna a ni," a ti. Ṭhalfavang Kût khâr ní-ah hian hnam lâm, malzai, live band, bike stunt show, power glider leh intihhlimna chi hrang hrang buatsaih a ni. (Thlalatu - Tlau Liana)