Lungleia cheng nuai 2,185 hû project UDPA Minister-in LMC hnenah a hlan
Urban Development and Poverty Alleviation (UDPA) minister K Sapdanga chuan cheng nuai 2,185 hû project chu Lunglei Municipal Council (LMC) enkawl turin LMC chairman Lalzuithanga hnenah nimin khan Aizawl Sumtual, Secretariat Complex-ah a hlan.
LMC hnena project hlante hi 39 a ni a, thawh mek te, a ṭhen contractor thlan tawh la thawh lohte leh contractor la thlan lohte a ni. Project hrang hrangah hian financial proceeding eng eng emaw avangin LMC hnenah fund hlan a rem lo a, LMC-in thawkin, a ṭul ang apiangah UDPA directorate-ah fund an dil ṭhin dawn a ni.
Nimina project an inhlan tâkte bakah hian project ṭhenkhat, UDPA department-in LMC hnena an la hlan tur, tuna hlan la remchang chiah lo a awm bawk.
UDPA Minister chuan, LMC hnena project 39, cheng nuai 2,185 hû hlan chhawn a ni chu lawmawm a tih thu sawiin, "Budget leh funding lamah harsatna a awm ṭhin chunga LMC-te'n tlo leh ṭha taka hna an la thawk thei hi a lawmawm. Hmasawnna hnathawhte tluang taka a kal zui zel theihna atan department leh LMC inkarah thawhhona ṭha awm zel se ka duh," a ti a, LMC chu duhsakna a hlan.
Project inhlan chhâwnnaah hian UDPA secretary V Lalsangliana leh director Jacob Lalawmpuia bakah, official dangte an tel a; LMC Chairman hi vice chairman K Lalrinawma, LMC secretary Lalremruata leh official dangte'n an ṭawiawm. Project zawh tawhte leh enkawl zui dan tur bakah, hmalakna hrang hrang an sawiho nghal a ni.
LMC HNENA PROJECT HLANTE
☑ Solid Waste Management Centre–I
☑ Improvement & Upgradation of Solid Waste Management Centre-I
☑ Solid Waste Management Centre–II
☑ Construction of Approach Road for Existing Solid Waste Management Centre-II
☑ Remediation (Bio-mining) of Legacy Waste
☑ Construction of LMC Complex
☑ Construction of Transport Hub
☑ Construction of Multi Level Car Parking at Ṭhuamluaia Mual
☑ Renovation of Lunglei Park
☑ Composite Urban Infrastructures Development Works
☑ Construction of Storm Drain & Drainage Network within Lunglei District
(Heng project head hnuaiah hian project hrang hrang ṭhen sawm leh a ni)