Tual thattua puh Denghmingthanga Lunglei Police Station aṭangin a tlanbo

2nd September, 2026

H Lalramdinpuii (15) d/o H Lalawmpuia, Mualṭhuam North thattua puh Denghmingthanga (20), Mualṭhuam North chu Thawhṭanni zan zanlai pelh hnu, nimin zing dar 1 vel khan Lunglei Police Station aṭangin a tlanbo a, nimin tlai thleng khan hmuh a la ni lo.

Thu dawn danin, Denghmingthanga hi kutkawl (handcuff) vuah chung leh pheikhawk bun loin Lunglei PS aṭangin a tlanbo a, a tlan chhuak tih hriat a nih veleh police-te'n an zawng nghal a, nimin tlai thleng khan hmuh a la ni lo. YMA Sub-Headquarters, Lunglei chuan an huam chhunga YMA branch-te an ngen angin, YMA member ṭhahnem tak Denghmingthanga zawngin an thawk chhuak.

Nimin zing khan Mausen khawtlang hruaitute chu Lunglei police-te'n biain, lirthei tlante endik turin an ngen. Police ngen angin Mausen khawtlang hruaitute chuan lirthei 10 vel an endik hman a, mahse, police-te'n chawlhsan rih tura an ngen angin Mausen khawtlang hruaitute chuan lirthei endik an chawlhsan a ni.

Lunglei police-te chuan August 31, Thawhṭanni chhun dar 12 vel khan Denghmingthanga chu thu zawhfiah turin Lunglei District Court phalnain Lunglei District Jail aṭangin an la chhuak a, darkar 72 chhung an kawl phalsak an ni.

Nimin tlai lam khan Lunglei Rahsi Veng thlanmual thlen hma khâmah Denghmingthanga hi zuang thla leh lak chhuah tum a nih thu social media-ah a darh a; mahse, Denghmingthanga hi khâmah a zuang thla ngei tih finfiahna a awm lo.

Denghmingthanga zuan thlakna nia sawi khâmah mihring chê ni âwm tak hmuh a nih avangin Lunglei SP hoin police-te an kal a, mipui an pungkhawm bawk. Nimin tlai thleng khan finfiahna a la awm lo a, Denghmingthanga pawh hmuh a la ni lo.

Lunglei Sub-Hqrs YMA chuan, Denghmingthanga zawng chhuak tura hma lakpuiah Police-in an ngen angin, an hnuaia YMA branch-te chu an huam chhungah ṭheuh mit lên a, police-te thawhpui tur leh hmu an lo awm a nih pawhin kut thlak lo turin an chah.

Denghmingthanga chin hriate chu Lunglei PS phone number 9485414441-ah emaw, YMA hruaitute hnenah emaw hriattir turin an ngen bawk.