KHAWTHLIR
FIR thehlut lo
January 27, 2026-a Mizoram Police press statement-in Marina Lalchhanchhuahi, Tanhril thattu anga a tarlan RL Peka, Tanhril in mipuiin an khawih avang leh Tanhril chhuahsan tura tih an nih kaihhnawihah 'RL Peka nupuiin FIR a thehlut' tiin Vanglaini September 1, 2026 chhuakah tarlan a ni. FIR hi VL Peka (L) nupui Lalṭanpuii thehluh ni loin, Vaivakawn Police Station-in suo moto-in January 29, 2026-ah thubuai a ziah luh zawk a nih thu dawn a ni.
Ambulance hlan
Mamit bawrhsap Suvigya S Chandra chuan nimin khan Jute Corporation of India corporate social responsibility (CSR) kaltlanga lei ambulance chu Mamit District Hospital hotute hnenah a hlan. DC chuan, "Aspirational district kan nih anga hamṭhatna leh duhsakna hrang hrang kan dawnte hman ṭangkai nachang kan hriat a pawimawh," a ti.
UPSC Grooming
UPSC Grooming Scheme Entrance Examination, 2026 neih zawh taka coaching kal tura thlan zirlai 10-te pualin nimin khan Mizoram Board of School Education conference hall-ah counselling buatsaih a ni. Counselling-ah hian civil service exam kalphung te, exam hmachhawn tura inbuatsaih dan te, an hnathawh dan te, coaching class kalpui dan tur leh an zir dan turte inhrilhfiah a ni.
School Nutrition Garden hawng
Champhai bawrhsap Mohammad Aaquib chuan nimin khan Champhai Vengthlang Middle School-ah National Nutrition Month puala buatsaih 'School Nutrition Garden Programme' a hawng. Programme hi Champhai district-a elementary school dangahte pawh hman a ni a, Champhai District Transformation Programme hnuaia Project LEAD nen kalkawptir a ni.
CD ratio 78.75%
Mamit bawrhsap Suvigya S Chandra hoin nimin khan DCC leh DLRC an ṭhu a; April - June 2026 chhungin Mamit district-a bank 14-te credit deposit ratio chu 78.75% a nih thu tarlan a ni. DC chuan, Mamit district-a bank-te chu mipui tana thawk an nih angin hamṭhatna leh chanvo an neihte mipuiin an hriat theih nan line department-te nen ṭangrual thiam turin a chah.
Sum ruahman pawm
Serchhip bawrhsap Paul L Khuma kaihhruaiin nimin khan DC meeting hall-ah National Mission on Natural Farming hnuaia District Level Monitoring Committee an ṭhu a, hmalak tawh dan leh hmachhawpte thlirhoin, kum 2026-27 atana sum ruahman an pawm. Natural Farming hnuaiah hian 2026-27 atan Serchhip district-a cluster 21-ah loneitu 2,625-te hmalakpui tura ruahman a ni.
Cadastral Survey Operation
Saituala Land Revenue & Settlement assistant commissioner Mary L Rodinpuii chuan, Keifanga agriculture LSC/periodic patta nei tawh leh la nei lote chu September 15 - November 2, 2026 chhungin Modern Survey hmanga teh vek tur a nih thu a tarlang. Cadastral Survey Operation hnuaia ram teh ṭhat turah a hmaa pass awm tawh zawng zawng thlak a ni dawn a ni.
Zirhona buatsaih
Mizoram Board of School Education chuan nimin khan Champhai Block Resource Center training hall-ah 'How to fill HPC at the secondary stage' leh 'Sensitization training programme for Headmasters' tih thupui zirhona an buatsaih. Zirhona hi Champhai leh Khawzawl district-a sikul headmaster-te leh zirtirtute puala buatsaih a ni a, ni thum a awh dawn a ni.
Dan loa pension lâk tihreh dan tur sawiho
Aizawl North Treasury leh Aizawl South Treasury chuan August 31, Thawhṭanni khan Thingsulthliaha SIRD Conference Hall-ah dan loa pension/family pension lâk tihreh dan tur sawihona an buatsaih a; Thingsulthliah BDO hnuaia khua leh veng tina VC te, YMA leh kohhran bial hruaitu te, pensioner te, office DDO-te leh nau piang leh mitthi chhinchhiahtute an tel. Dan loa family pension late'n anmahni duhthlannaa sorkara pension document an pek let hun a hawn chungchang inhrilhfiah a ni.