Hman khat daih plastic/sarâng khap

Champhai bawrhsap Mohammad Aaquib chuan thupek chhuahin, Champhai district-a hmun thlan bik 15-ah hman khat daih plastic/sarang (single use plastic) hman leh zawrh khap a nih thu a puang. Thupek bawhchhia chu Rs 200 - Rs 5,000 chawitir leh lung-in tàntir thlenga hrem theih a nih thu a tarlang.

Bawrhsap chuan, Champhai district-a hmun pawimawh, mipui leh khualzinte'n an tlawh tam (tourist site) 15-ahte single use plastic hman, zawrh leh paih khap tlat a nih thu a tarlang a, "Heng hmun 15-te faina kawnga ven, enfiah leh enkawl zui hi local body (VC)-te mawhphurhna a ni ang," a ti.

Champhai district-a hman khat daih sarâng/plastic khapna hmunte chu - Mualnuam, Mualbuhvum, Keilungliah, Zote Park, Eco-Cultural Park (Tlangsam), Kawtchhuah Ropui (Vangchhia), Lianchhiari Lunglen Tlang (Dungtlang), Mizo Hlakung-pui Mual (Khawbung), Zopui Phul (Samthang), Ṭhasiama Seno Neihna, Beram Tlang, Fiara Tui (Vaphai), Thlangtlak Mual, Lamsial Pûk leh Fiara Tui (Farkawn)-te a ni.