Min vote lote tan pawh MLA ka ni - Lalduhoma
Assembly House-a opposition leader leh ZPM leader Lalduhoma chuan nimin khan a bial, Serchhip bial chhunga Thenzawl Joint YMA Hall-a amah lawmna inkhawmah thu sawiin, amah chu ZPM mite tana MLA bik a nih loh thu leh a bial mipui, amah vote lote tan pawha MLA a nih thu leh enhran bik a neih loh tur thu a sawi.
Lalduhoma chuan, Serchhip bial pumpui tana MLA a nih angin, amah vote-tute ta a ni bik lo a, bial mipui zawng zawng ta a nih thu sawiin, party danga V/C te, NGO leh kohhran leh mipuite chu ram leh khawtlang tan hmasawnna tura thawhpuiah a sáwm a; "ZPM MLA-te chuan, mi tu pawh, min vote ve lo tia rilru tê pu loin, ṭanpui theihnaah chuan kan pui ang a, party bil ta kan ni lo a, mi zawng zawng ta kan ni tawh," a ti.
MLA fund chu sum siamna tur a ni lo tih sawiin Duhoma chuan, "Khawtlang tana ṭangkai taka hman tur a ni," a ti a; rilru thianghlim taka hman a nih chuan, khawtlang leh bial tan ṭangkai taka hman theih a nih thu a sawi.
ZPM Leader chuan, sorkar hnathawkte'n ṭha taka hna an thawh theih nan theihtawp chhuah a tum tih sawiin, Serchhip bialah sorkar hnathawk vau a, politics inrawlh vanga dik lo taka hna thawhtir an awm a phal lo tih a sawi a, "Chutiang an awm a nih chuan, min hrilh se, chhan kan duh a ni," ti.
Lalduhawma chuan, ZPM-in sorkarna siam lo mah se, an manifesto-te a bial tan theihtawp chhuaha tihhlawhtlin a tum tih sawiin, opposition MLA thil ti thei lo nih a tum loh thu leh, Mizoram budget hmang kher lo pawhin eng eng emaw a thawh theih a beisei thu a sawi a; Mizoram inthlanpui awm leh hunah chuan ZPM-in sorkarna an siam ngei a rinawm thu a sawi bawk.
Serchhip bialtu MLA hnenah hian ZPM, Thenzawl Block hruaitute'n Thenzawl leh a chhehvel hmasawnna atana ngaih pawimawh tura an duh point pali an lo thlen. Lalduhoma hian vawiin hian Buangpui leh Neihloh khuate a tlawh leh dawn a ni.