HM Chama'n central service-a tling thei tur khawpa zir turin zirlaite a fuih
Home minister Lalchamliana chuan, Mizo ṭhalaite thinlungah Mizo nationalism a alh chho mek nia sawiin lawmawm a tih thu a sawi a; Mizo ṭhalaite chu zirnaah ṭan la a, central service-a tling thei tur khawpa zir tur leh tum mumal nei turin a fuih.
Home Minister hian nimin khan a bial chhung, Hrangturzo chhunga zirlai pawl, Tuichangral Zirlai Pawl (TZP) Genetal Assembly vawi 9-na, Lungkawlh khuaa neih a hmanpui a; zirlai kal khawmte chu central leh state service-a tling thei tura lehkha zir uar tura fuihhin, "Tunlai Mizote zinga nationalism nasa tak a alh mek hi thil lawmawm tak a ni. Kan zirna leh thiamna a san ang zela ram leh hnam hmangaihna rilru kan put tial tial a pawimawh," a ti.
Lalchamliana chuan, sorkar hnathawh ringawt ni lo, private sector lama eizawnna uar a ṭul thu leh India ram mai ni lo, ram páwn thlenga eizawnna kawnga hmasawn a ṭul thu a sawi a, "Hetiang lam hawi zawng eizawnnate hi fimkhur taka kan thlan thiam a pawimawh hle," a ti a; zirlaite chu an bial hmasawnna tur a theihtawp chhuahpuiah sáwmin, khua leh tui ṭha ni thei tura ruihlo laka insûm turin a fuih bawk.
Minister Lalchamliana hian nimin vêk khan Tuichang luia lei dawh hna kal mek a enfiah nghal a; hna thawktute chu chak tak leh rintlak taka hna thawk turin a chah a ni.