Khawlai chei mawi ber Ramhlun S

Tourism department bultuma Aizawl khawpuia véng hrang hrangte tana khawlai chei mawi thlanna, 'Christmas Street Decoration 2018' hnuaiah nimin khan Tourist Lodge, Chaltlangah lawmman sem a ni a; khawlai chei mawi ber chu Ramhlun South niin, a cheitu Ramhlun South Nuvalai hnenah lawmman hlan a ni.

Lawmman sem inkhawm hi Tourism director Biakthanmawia'n a kaihruai a; khuallian Tourism secretary Esther Lalruatkimi chuan, "Kan ram economy chawi san theihna hmanraw pawimawh tak chu tourism hi a ni. Christmas Street Decoration hmang hian mipuite tan tualchâina tur nuam tak kan buatsaih mai bakah, khualzinte hîpna hmanraw ṭangkai takah kan hmang thei a ni,” a ti a; nasa zawka khawlai chei a, Tourism-a Mizoramin hma a sawn theih nana hmang ṭangkai turin kal khawmte a chah. 

Khawlai chei mawi bertu Ramhlun South Nulvalai hnenah Rs. 4,00,000 hlan a ni a, pahnihna Chaltlang Branch YMA hnenah Rs. 3,00,000 hlan niin, pathumna Mission Veng Branch YMA leh Tuikhuahtlang Branch YMA hnenah Rs. 1,00,000 ve ve hlan a ni.