Naupang 156-in in pakhatah dawhthlâk an dawh

Saitual Chhimvenga mi, Lalrinliana h/o Lal­rammawii te chhungkua chuan kum eng emaw ti kal ta aṭang khan Krismas urlâwk zanah naupang ṭhahnem takin an ina thleng an dawh (dawhthlâk)-ah thil chi hrang hrang an thlâk ṭhin a; nikum 2018 Krismas urlâwk zan khan naupang 156-in thleng an dawh. Lalrin­liana chuan, naupang thleng dawha thil chi hrang hrang an sem chhuah tûk chu kum khata an chhungkaw hlim ber tûk a nih ṭhin thu a sawi.

Vanglaini palaiin an ina a kawmnaah Lal­rinliana chuan naupangte tana thleng dawh (Mizoram hmun tam taka 'thleng dawh' an tih hi Saitual leh a chhehvelah chuan 'no dawh' an tih ṭhin)-a an thlak ṭhina bul an ṭan dan a sawi a,  "Kum 1995 vel aṭang khan kan fate'n no dawh an hre ṭan a, an unauin an dawh ṭhin. Kum 2000 vel aṭang khan an ṭhiante'n an rawn dawh ve ṭan a, chu'ng lai chuan mi 30 vel an tling. Tun anga an tam chhoh tak hi chu kum ruk liam ta vel aṭang khan a ni," a ti.

Lalrinliana te hi sumdawng an ni a, in chhung mamawh chi hrang hrang bakah naupang lâwm (toys) an zuar. Lalrina chuan, "Nikum khan mi 100 velin no an rawn dawh a, mipa leh naupang lâwm tur kha a hrana thliarin kan siam rem sa vek a ni," a ti a; thleng dawh tur naupang an tam tham avangin an hming leh nu leh pa hming ziahna chu thleng tinah an dah vek ṭhin thu a sawi.

No dawh an thlak dan sawiin Saitual pa chuan, "September thla vel aṭangin naupangte'n 'A pu, Masi hunah no kan rawn dawh dawn a nia aw,' an rawn ti ṭhin a, keini pawh kan phûr thei hle. Dawrkai kan nih avang­in urlâwk zan hi chuan dar 12 hmain kan mu hman ngai lo, no dawh kan thlak zawh meuh hi chuan zing dar 3 vel a ni tawh ṭhin," a ti.

Lalrinliana te chhungkuain naupangte tana dawhthlak an pek ṭhin hian tun hma chuan mi hriat a hlawh ngai lem lo a, kum 2016 urlâwk zan khan nula leh tlangvalin zan rei takah an dàwr a, an in chhung chhuata thleng dawh tam tak an hmuh chu mak tiin thla an laksak a, social medial-ah dahin, mi tam takin an hriat phah ta a ni.

Lalrinliana chuan, "Zing hma takah hian no dawh en tum naupang an rawn intlar ṭhin a, cake kan siamsak a, kan zai hnuah a indawtin kan sem chhuak ṭhin. Masi tûkah hian ei rawng kan báwl hman ngai meuh lo," a ti a; nikum (2018) bikah chuan an ṭhenawma mi Vanlalsiami'n dawhthlak tur a tumpui thun leh, naupangte hnena an sem chhuahnaah pawh an chhungkua bakah mi parukinan puih thu a sawi.

Vanglaini zawhna chhangin Lalrinliana chuan, "No dawh turin tumah kan sáwm ngai lo, kan sàwm khawm ni dawn ta se, mi 10 pawh sàwm tur kan hre kher lo ang. Pathianin a rawn hruai khawm an ni a, a hnen aṭanga malsawmna tam tak kan dawnte mi dang hnena pek chhuah ve theihna hun kan nei thei hi a lawmawm hle," a ti.

Lalrinliana chuan, "Pathianin a rawn hruai khawm naupangte hian kan inah no rawn dawh an duh a nih chhung chuan keini chhung chuan kan tàwpsan ngam lo ang. Thil hlu tak tak pe chhuak thei lo mah ila, kan sem chhuah ang angte làwm taka min pawmsak ṭhin avangin kan lawm zawk hle a ni," tiin a sawi bawk.