Mizoram sorkar college-ah zirtirtu nghet post 778 zinga 204 a ruak; Saihaah 57.14% ruak, college 2-ah post ruak lo

Mizoram sorkar hnuaia college 21-ah zirtirtu nghet post 778 a awm a, chu'ng zinga post 204 chu a ruak. Saiha College-ah zirtirtu nghet post 57.14% a ruak a; Aizawl West College leh T Romana College-ah zirtirtu post hnawh khah vek a ni.

Higher & Technical Education minister Dr Vanlalthlana'n August 27, 2026-a Assembly fûr ṭhutkhawma a tarlan danin, Mizoram sorkar enkawl college 21-ah zirtirtu nghet post 778 a awm a, chu'ng zinga 574 (73.78%) chu hnawh khah a ni a, 204 (26.22%) chu a ruak thung.

Mizoram sorkar college zingah hian Saiha College-ah zirtirtu nghet post 28 zinga 12 chu hnawh khah niin, post ruak 16 (57.14%) a awm a; college 21 zinga post ruak ngah ber a ni. Hetihlai hian, Aizawl West College-a regular post 37 leh T Romana College-a regular post 36-te chu hnawh khah vek a ni thung a; college 21 zinga post awm zawng zawng hnawh khah vekna college awm chhun an ni.

Sorkar college 21 zingah hian Lunglei College-ah zirtirtu nghet post 64 awmin, zirtirtu nghet post ngah ber a ni a; Zirtiri Residential Science College (post 63)-in a dawt. Mamit College leh Khawzawl College chuan zirtirtu nghet post 18 ve ve an nei a, regular post nei tlem ber an ni.

Aizawl bikah Mizoram sorkar hnuaia college pariat zingah, Hrangbana College-ah zirtirtu nghet post 59 an neih zinga post 13 (22.03%) a ruak a, post ruak ngah ber an ni. Aizawl College-ah post 57 awm zinga 12 (21.05%), Zirtiri RSC-ah post 63 zinga 11 (17.46%), Johnson College-ah post 26 zinga pathum (11.54%), J Thankima College-ah post 27 zinga pahnih (7.41%) leh Aizawl North College-ah post 32 zinga pakhat (3.13%)-te a ruak bawk.