Eirawngbawlna gas man thar tichhuak; Domestic man a ngai; commercial man pung

Mizoramah eirawngbawlna gas com­mercial cylinder (kg. 19) leh XtraTej (kg 19) man September 1, 2026 aṭangin a pung a; chhungkuaa eirawngbawlna atana hman tlánglâwn domestic cylinder (kg 14.2) leh composite (kg 10) man erawh a pung lo a, July 2026 aṭangin a la danglam lo.

Indian Oil Corporation-in eirawng-bawlna gas (LPG) man a tihchhuah thar zuiin Food, Civil Supplies & Con­sumer Affairs (FCSCA) department chuan Mizorama gas man a bithliah a, Sep­tember 1, 2026 khan hman ṭan a ni.

FCSCA tarlan danin, Vairengte tih loh Mizoram hmun dang zawngah domestic cylinder man Rs 1,094 (August-ah Rs 1,094) a ni a; commercial cylinder man Rs 3,228.50 (August-ah Rs 3,217.50), XtraTej man Rs 3,251 (August-ah Rs 3,239.50) leh composite man Rs 787 (August-ah Rs 787) a ni. Domestic cylinder man hi Mizoram hmun dang aiin Vairengte-ah Rs 9-in a tlawm zawk.

Gas man hi home delivery kalpuinaah chuan a man pangngai aṭangin Rs 70 belh zel tur niin, point delivery-ah Rs 7.53 belh tur a ni a; distributor kudama hralh a nih chuan Rs 33.43 paih tur a ni thung.

Domestic gas cylinder man hi West Asia buaina vanga March 7, 2026-a sorkar laipuiin Rs 1,005 (Vairengteah Rs 996) aṭanga a tihsan hnuah a la tlahniam leh lo a ni.