Mizorama mimal damdawi-inte'n rate azirin MUHCS zawm an hnial lo
Non-Government Hospital Association of Mizoram (NGHAM) chuan, Mizoram sorkarin kohhran damdawi-in ṭhenkhat leh mimal damdawi-in dangte a pek ang rate emaw, phaia damdawi-in tam takte a pek ang rate emaw a pek theih chuan MUHCS zawm an hnial loh thu leh, deemed empanelled ang talin sorkarin pawm se an duh thu an puang.
Mimal damdawi-in intèl khawmna, NGHAM hian nimin khan thuchhuah siamin, rîkrûm thilah emaw, khum chan loh vang emawin damlo tam takin MUHCS zawm lo damdawi-in an pan thu an sawi a, "Damlote an mangang em em ṭhin. BP leh zunthlum sange, heart attack, nikhawhreloa awm, khawsik sangte emergency si, ICU awm ngai si lote'n an bill thei lo vek," an ti a; MUHCS zawm damdawi-in aṭanga hmanraw ṭha zawk mamawh vanga MUHCS zawm lo damdawi-ina kalte pawhin an bill thei lo tih an tarlang.
Hetiang a nih avang hian, sorkarin rate ṭha pangngai, kohhran damdawi-in ṭhenkhat leh damdawi-in dangte a pek ang emaw, phaia damdawi-in tam takte a pek ang emaw a pek theih chuan MUHCS zawm an hnial lo tih NGHAM chuan an tarlang a, "Mizoram sorkar hian Mizorama private hospital kan neih vete hi phai lam hospital inremna zûlzuiin inremna min siampui thei se kan duh hle," an ti.
NGHAM chuan, cashless-a MUHCS zawm lo damdawi-in ṭhenkhat, enkawlna senso (MR) sorkara bill thei si (deemed empanelled) anga dah pawh an duh thu an tarlang a, "Woodland Hospital, Shillong leh Silchar Cancer Institute, Silchar te dinhmun ang tala MUHCS kan zawm ve theih hma pawhin min dah turin kan ngen a ni," an ti a; MUHCS deemed hospital an nih chuan mipuiin nasa taka an hlâwkpui an beisei thu an sawi.
Mizorama private hospital-te chu ram tan entreprenuership development-ah a thawh hlâwk pawl nia an inhriat thu sawiin NGHAM chuan, "Medical lamah hmasawnna tam tak thlentu kan nih piah lamah, ṭhalai tam tak tan hna a sâng tél siamtu kan ni mek," an ti a; MUHCS zawm tura an inremsiam theih chuan mipui tan ṭhatna tam tak a neih dawn thu leh sum tam tak Mizoram pawna chhuak tur hum a nih dawn thu an tarlang.
Mizorama mimal damdawi-in zinga MUHCS zawm lo damdawi-inte chu - Trinity Hospital, Ebenezer Medical Center, Greenwood Hospital, Aizawl Hospital, LRM Hospital, Agape Multispeciality Hospital, Rosewood Hospital, City Hospital leh Adventist Hospital, Aizawl te an ni.
MUHCS inkaihhruainaah chuan MUHCS zawm lo damdawi-inah hian rîkrum thil - ICU-a damlo dah nghal ngai te, nunna chhanna tura zai nghal ngai te, chetsualna vanga nunna chhan tura enkawl nghal ngaite chu an inenkawlna senso MUHCS aṭangin pek theih a ni.