RD department hmalakna thlir lêt

Rural Devlopment department-a thawkte chuan nimin khan Hotel Floria-ah an hnathawh thlir letna hun an hmang a, RD minister Lalruatkima'n a hmanpui.

RD Minister chuan, an depart­ment-in ram hmasawnna turin mawh­phurhna a nei lian hle tih sawiin, "Mi zawng zawng huap depart­ment a ni. RD department-in ram pum huap pawha hna thawk ṭha lawmman an la thei hi a chhuan­awm hle a, hotu te, officer-te leh thawktute thawhrimna rah a ni," a ti.

Lalruatkima chuan SEDP chung­chang sawiin, "SEDP hi thingtlang mipuiin lei rem an rah theihna tur leh eizawnna ngêlnghet neih theihna tura hmalakna a ni," a ti a; kalkhawmte hnenah chuan SEDP hnuaiah thing­tlang hmasawnna atana mawhphurhna sang zawk pek an nih pawhin theih­tawp chhuaha thawk zel turin a chah.

Mizoram hmasawnna tura scheme leh project hrang hrang kal­puinaah theihtawp chhuah a ngai thu sawiin Lalruatkima chuan, "Kan kalpui dan endik chungchangah pawh fimkhur leh uluk lehzuala ṭan lak a ngai. Scheme hrang hranga hamṭhatna dawngtu turte thlannaah pawh mamawh ngawih ngawihte ngaih pawimawh ṭhin tur," a ti.

Meeting-ah hian RD Secretary-in department project leh scheme hrang hrang a sawi zau a, an hmalak dante a sawifiah bawk.

-    PMAY(G) (mirethei tana insak ṭanpuina) kum 2016-17 first instalment-ah hian target 2,401 a ni a, sanction zat  2,401 niin 2,033 sak zawh a ni. 

-    Thingtlanga chengte'n hmasawnna tluangtling an neih theih nana ruahman Mission Antodaya hnuaiah khaw tinin an hmasawnna tur zawng chhuakin chumi hnuah department hrang hrangin an thawhhona hnuaia hmalak tur a ni a, October 2017-ah ṭan a ni.

-    Sansad Adarsh Gram Yojana (SAGY) hnuaiah hian MP-te'n model village atana an thlanah phase I-ah Chhiahtlang leh Khawlailung thlan a ni a, Phase II-ah Haulawng leh Tlungvel thlan niin, hmalakna kalpui mek a ni.

-    Mizoram State Rural Livelihoods Mission (MzSRLM) hnuaiah tun dinhmunah self help group 4,303 hnenah revolving fund atan cheng nuai 456 vel sem a ni tawh.

-    MGNREGA hnuaiah job card nei mi 1,92,000 an awm a, ni khatah Rs. 194 an hlawh.