KHAWTHLIR

Thisen pe

State Institute of Rural Development & Panchayati Raj, Durtlang Leitana thawkte chuan SIRDPR din champha vawi 25-na pualin nimin khan Synod Hospital tan thisen unit 11 an pe a, petute mipa pariat leh hmeichhia pathum an ni.

Natural farming zirho

Khawzawl district-a community resource person (CRP) leh bio-input resource centre (BRC) te pualin nimin khan Khawzawl KVK training hall-ah natural farming awmzia leh a pawimawhna te, CRP leh BRC-te mawhphurhna te, bio-input siam dan zirhona buatsaih a ni. Training-ah hian mi 36 an tel a, KVK Khawzawl subject matter specialist (agronomy) Rambuatsaiha'n thil pawimawhte a zirtir a ni.

Job Fair buatsaih

State Hub for Empower-ment of Women leh Even Cargo chuan nimin khan IPR auditorium-ah Mahila Rozgar Maah pualin 'Job Fair - Implementation Programme' an buatsaih a; Women & Child Development director Zoramthangi Chhangte-in a hawng. Fair hawnnaah hian MHIP, Single Mom’s Foundation, Territorial Women, Women’s Ministry, Salvation Army leh Crescent Home aṭangin hmeichhia 200 chuang an tel a ni.

Ruihhlo do sawiho

Khawzawl District Nasha Mukt Bharat Abhiyaan Committee chu nimin khan DC conference hall-ah an ṭhu a, SDO Chandrakant Bagoria-in a kaihruai. Annual District Action Plan (2026-27) atana NMBA hnuaia ruihhlo donaa hmalakna turte an rêl. NMBA Committee thlaktu District Level Drug Demand Reduction Committee din a ni a, NMBA member-te chu member an ni zui dawn a ni.

Kawngah thuziak leh reflector dah rêl

Saitual District Road Safety Committee chu district bawrhsap Srinivas Sadi kaihhruaiin nimin khan an ṭhukhawm a; lirtheia chetsualna thlen tamna hmunah thuziak leh zana lirthei êngin a chhuna kawng an hmuh fiah theihna tur reflector dah an rêl. Keifang Kualmawia police duty-naah plastic-a siam lirthei danna (barricade) dah ni se, bawlhhlawhin tui luankawr a hnawh apiangin tihfai zel ni se, an ti bawk.