Child Friendly Room tan bungrua pe Room-ah naupang 1,145 hruai tawh

Gauhati High Court judge Justice Nelson Sailo, Mizoram State Legal Services Authority executive chairman chuan Aizawl District Court-a Child Friendly Room tihchangtlunna tur nimin khan a pe. 2024-2026 chhungin Aizawl District Court-a Child Friendly Room-ah naupang 1,145 hruai an ni tawh tih tarlan a ni.

Child Friendly Room hi naupang harsatna tâwkte court-a an kal chánga engthawl zawka an awmna tur a ni. High Court Judge-in bungrua a pekte hi naupangte intihhlimna tur bungrua chi hrang hrang niin, inhlanna hun hi Aizawl District Court-a Child Friendly Room-ah hman a ni a, Mizoram State Commission for Protection of Child Rights hnenah a hlan.

Justice Nelson Sailo chuan, sorkar laipuiin naupangte humhimna tur dan tam tak a siam tih sawiin, "India sorkarin naupangte a humhalh tlat a, nakina kan ram hruaitu turte an nih avangin naupangte zingah court-a kal ngei ngei ngai an awmin, court chu hmun hlauhawm emaw an tih lohna turin an tan intihhlimna tur dah hi a ṭul," a ti a; Legal Services Authority-in district danga court-ahte pawh child friendly room din turin hma an lak mek thu a sawi.

Child Welfare officer Lalhmingchhuangi tarlan danin, kum 2024 aṭanga 2026 chhungin Aizawl District Court-a Child Friendly Room-ah naupang 1,145 hruai an ni tawh a, chu'ng zinga mi 207 chu pawngsual tâwk an ni.

Mizoram State Commission for Protection of Child Rights chairperson Jimmy Laltlanmawia chuan, naupangte chunga hleilenna titute'n an tihsual ang taka hremna an hmuh theihna tura naupangte court-a hruai an ngai ṭhin chu pawi a tih thu a sawi a; naupangte'n court chu hmun hlauhawm leh ṭihbâiawm anga an ngaih loh a, dik taka rorelna a nihna hmun tih an hriat theih nan leh hlim taka hun an hman theihna tura ngaihsaktu an nei chu lawmawm a tih thu a sawi bawk.