MLA-in CM Rubber Mission ṭanpuina sem

South Tuipui bialtu MLA Jeje Lalpekhlua chuan nimin khan Hnahthial DC conference hall-ah Chief Minister's Rubber Mission Phase-II hnuaia Hnahthial district-a ṭanpuina dawng tura thlan mi 80 hnenah ṭanpuina a sem.

Jeje Lalpekhlua chuan, CM Rubber Mission tum ber chu - kut hnathawktute tan eizawnna ngêlnghet siam a nih thu a sawi a, "Hmalakna hi keimahni tan mai ni loin, kan tu leh fa kal zel turte tan a ni tih hria ila, pawisa leh hmaṭhatna kan dawn hi hmang ṭangkaiin, sorkarin mipui leh ram hmasawnna tura ruahmanna a siamte a thlen dik theih nan thil hi a nihna ang taka hman a pawimawh," a ti.

Mizoramin sawhthing a hmingthanpui mek tih sawiin Jeje Lalpekhlua chuan, "Ṭhelrêt lamah pawh hming kan chher ve thei a ni," a ti a; a ti tak takte chu puih a hreh loh thu leh, theihtawp an chhuah chuan a phak ang tawka theihtawp a chhuahpui tur thu a sawi.

CM Rubber Mission hi kum 2024 khan tlangzarh a ni a, Hnahthial district-ah hian kum 2025 aṭang khan phase II bul ṭan a ni. Hnahthial district tan hian Mission hnuaiah ṭhelret chinna tur ram hectare 80 ruahman a ni a, progress partner 80 an awm mek. Mission kalpui turin Hnahthial district-ah rubber producer society panga - Hnahthial, Rawpui, Bualpui V, Darzo leh Chhipphir-ah te din a ni a, zau pakhat ṭheuh an enkawl.

Progress partner pakhatin ṭhelret ṭiak 450 zel phunin, Hnahthial district-ah ṭiak 36,000 phun a ni a; ṭanpuina hi NABARD hnuaiah mi 50 leh Bána Kaih hnuaiah mi 30-in an dawng. Ṭanpuina sum hi ṭhelret ṭiak leina leh phurhna atan te, a khur laih nan, thiar nan leh sâm fai nan bakah, terrace laih nante hman tur a ni.