Mit lama harsatna neite tan hmanrua sem

Social Welfare minister Lalrinpuii chuan September 1, Thawhlehni khan Dawrpui Multipurpose Centre-ah Mizoram sorkar leh Toyota Kirloskar Motor Pvt. Ltd thawhhona hnuaia Aizawl leh Lunglei district-a mita harsatna neite tana siam tiang (safe mobility device) a sem.

Lalrinpuii chuan, sorkar leh Toyota Kirloskar Motor ten thawhhona ṭha tak an neih thu a sawi a, "Mizoram sorkar chuan pianphunga rualbanlote tana hamṭhatna awm thei ang angte hai chhuahpui leh an hmasawnna tur ngaihtuah a ngai pawimawh a, hemi lama hma la tur bik Commission pawh a din a ni," a ti.

India ram chu welfare state a nih ang leh ram danpui pawhin chiang taka a tarlan angin, pianphunga rualbanlote tana hmalak chu sorkar leh mi tin mawh a nih thu sawiin Minister chuan, "Department mi leh sate thawhrimna a fakawm a, kohhran, khawtlang leh ram inrelbawlnaahte thleng pawhin chanhai zawkte'n leirem an rah theihna tura remchang siamsak hi mi zawng zawng mawhphurhna a ni," a ti. Hmanrua dawngtute chu hmasawn zel tura rilru tipaukhauh tur leh, an thlen chin aṭanga hmasawn zel turin a chah bawk.