Kolasib-ah cheng vbc 13 hû ruihhlo hal

Kolasib district bawrhsap H Dolianbuaia kaihhruaiin nimin khan District Level Narco Coordination Centre (NCORD) an ṭhukhawm a; ruihhlo man sa cheng vbc 13 hû Kolasib Police Station kawtah dan angin an hâl.

Bawrhsap chuan, ruihhlo donaa theihtawp chhuahtute chungah lawmthu a sawi a, "Kolasib hi state dang nena ramri hrûla awm kan nih avangin sual ngampatna leh ruihhlo tawlhrukna (transit route) atana hmun remchang kan ni a, ruihhlo do tur hian sorkar chauh ni loin, tlawmngai pawl leh khawtlang mipui kan thawhho zel a ngai," a ti.

Police hotute tarlan danin, ruihhlo vangin kuminah Kolasib district-ah mi 20 an man tawh a, thubuai 12 an ziak lut tawh. Heroin kg 2.310 leh methamphetamine kg 21 man tawhin, chungte chu NCB rate-ah chuan cheng vbc 25 hû a ni. Zu kaihhnawihah mi 20 manin, thubuai 15 an ziak lut a, zu an man zawng zawng chu Rs 1,46,06,000 hû a ni.

Ṭhutkhawm zawh hian Kolasib PS kawtah ruihhlo man khawm sa chinfel tawh - heroin kg 1.767 leh methamphetamine (yaba tablet) kg 12.5 hâl a ni a, NCB rate-ah Rs 13,53,40,000 hû a ni. Ruihhlo man kawnga thawk ṭhate hnenah chawimawina hlan a ni bawk.