KHAWTHLIR

Health minister Dr R Lalthangliana chuan January 3, Ningani khan Aizawl Civil Hospital-a thlî paihna chungchangah Dawrpui Welfare Committee-te a kâwm a, a hmunah mipuite'n harsatna tawhte an enfiah nghal. Health Minister chuan, thli paihna chu mumal taka kalpui a nih tur thu sawiin, "Department hrang hrangte 

ṭanho a pawimawh tak zet a ni," a ti.

Mizoram Upa Pawl (MUP), Kolasib Hmar Veng chuan nimin khan an din champha an lawm a, Kolasib bialtu MLA K Lalrinliana'n a hmanpui. K Lalrinliana chuan, upate chu hnam ro hlu an nih thu sawiin, "Ram leh hnam changkang apiangin upate an ngaihlu a. Upate tawnhriat hi ro hlu a ni a, khawvel ṭhang zelah ṭhangtharte'n nghet tak leh mahni inringtawk taka khawsak phah nan an hmang ṭhin a ni," a ti.

Minister R Lalzirliana chuan nimin khan Central YMA office bearer-te a pisaah léngah sáwmin a kawm a, ram leh hnam tana thawhpuiah a sáwm. Art & Culture department changtu a nih angin R Lalzirliana leh CYMA OB-te hian kumina Chapchar Kût hman dan tur an sawiho nghal a, R Lalzirliana chuan, Mizoram chhung leh páwna chawimawi tlakte chawimawi ṭha a tih thu a sawi.

Information & Public Relations (IPR) minister Lalruatkima chuan January 3, Ningani khan a pisaah IPR department-a thawkte a kâwm. Minister chuan, IPR department chu sorkar hmalakna scheme leh programme hrang hrangte puangzartu a nih thu sawiin, "Sorkar hmalakna mipui hnena hrilh darhtu leh zirtirtu in ni a, MJA nena thawhhona ṭha tak nei chhunzawm zel ang che u," a ti.  IPR director David L Thangliana chuan department harsatna te, hmalaknate leh hmachhawpte a tarlang.

Mizoram Synod hnuaia pastor/minister leh probationary pastor, kumin aṭanga awmna sawn turte chu an awmna thar turah an insawn kual mek a, Mission Venga Synod hruaitu insawn turte chu January 4-5 chhung khan an awmna thar turah an insawn zo thawkhat. Pastor leh pro.pastor awmna sawnte chu January 13, Pathianni chawhnu khian an awmna turah induction service neihpui an ni ang.