Delhi-a tui sawihonaah minister pahnih tel

Ministry of Jal Shakti chuan September 1-2, 2026 chhung khan Delhi-ah 'Departmental Summit on Water Programme' an buatsaih a; Mizoram aṭangin Irrigation & Water Resources (IWR) minister PC Vanlalruata leh Public Health Engineering (PHE) minister Prof. Lalnilawma te an tel.

Summit-ah hian state hrang hrang aṭangin Water Resources leh PHE minister-te an tel a, prime minister Narendra Modi leh Jal Shakti minister CR Patil ten an hmanpui. Mizoram minister-te hi IWR secretary Lalrothanga leh PHE secretary Zodingpuii ten an ṭawiawm.

PC Vanlalruata chuan, Mizoramin ruahtui a dawn ṭhat rualin, a luan ral nasat thu a sawi a, "Ruahtui khawl (rainwater harvesting) lamah theihtawpa hmalak mek a ni a, ruahtui kan khawl ṭhat theih chuan agriculture pawhin nasa takin hma a sawn thei ang. Chumi tur chuan DPR-te buatsaih mek a ni a, Ministry of Jal Shakti pawhin lo ngai pawimawh thei se ka duh," a ti.

IWR Minister chuan, Mizoram Legislative Assembly-in dan thar pahnih - The Mizoram Water Information and Governance Bill 2026 leh The Mizoram Flood Plain Zoning Bill 2026 te a pawm thu a sawi a; Brahmaputra Board tihchangtlun a ṭul thu a sawi bawk.

PHE minister Prof. Lalnilawma chuan, "Mizoramah tuihna a tlem zela hriat a ni a, tuihna ngai pawimawhin PHE chuan Mizorama pawl lian ber YMA nen MoU kan ziak a, hma kan la mek. Kan tuihnate siamṭha leh turin sorkar laipui leh state sorkar ṭanrual a pawimawh," a ti a; Rural Development & Administration department hnuaia VB-GRAMG scheme leh PMKSY scheme aṭangin tuihna enkawlna leh siamṭhat hna thawh mekte a tarlang.