KHAWTHLIR

Thisen pe

Zemabawk Higher Secondary School NSS unit chuan September 2, Nilaini khan thisen pek huaihawtin, Civil Hospital, Aizawl tan thisen unit 44 an pe a, petute mipa 36 leh hmeichhia pariat an ni.

MLA-in hmanpui

South Tuipui bialtu MLA Jeje Lalpekhlua chuan nimin khan a bial chhunga Hnahthial HSS Annual Sport kharna a hmanpui. Jeje Lalpekhlua chuan, zirlaite chu hman tlak leh chhawr tlak ni tura fuihin, an tuina ringawt ni lo, an thiamna leh theihna ngaihtuah tel turin a chah a, "Beidawnna kara bei hram hram ṭhinte an hlawhtling ṭhin," a ti.

Action plan pawm

Siaha District Level Nasha Mukt Bharat Abhiyan Committee chu nimin khan bawrhsap VL Hruaizela Khiangte hoin an ṭhukhawm a; district level leh block level-a ruihhlo donaa hmalak dan tur action plan an pawm. Bawrhsap chuan, ruihhlo do hneh turin sorkar bakah kohhran, khawtlang leh pawl hrang hrangte thawhhona a pawimawh thu a sawi.

Lawngléng dah rêl

Lawngtlai bawrhsap Donny Lalruatsanga hoa nimina District Disaster Management Committee ṭhukhawm chuan Disaster Management & Rehabilitation Directorate aṭanga chhiatna thlen thulha hman tur Rs 31,39,500 an dawnte hmanna tur an rêl a; Tuipui Ferry leh Kawlchawa lawngleng (speed boat) dah tura hmalak an rêl bawk.

No Tolerance Month

Lawngtlai District Road Safety Committee chu nimin khan district bawrhsap Donny Lalruatsanga kaihhruaiin an ṭhu a, September 10, 2026 aṭangin 'No Tolerance Month' hman an rêl. No Tolerance Month chhung hian khauh taka dan anga hmalak a, dan bawhchhiate chu dan anga hrem ni se, an ti.

PM-RAHAT Scheme

Khawzawl district bawrhsap K Vanlalṭhiana kaihhruaiin nimin khan lirthei chetsualnaa hliam tuarten pawisa chawi loa damdawi-ina enkawlna (treatment) an dawn theihna tura sorkar laipuiin a duan 'PM-RAHAT Scheme' chungchang sawiho a ni a; scheme hi Khawzawl District Hospital, Sialhawk PHC, Biate CHC, Rabung PHC, Khawhai PHC leh Kawlkulh PHC-ahte hman theih a nih thu tarlan a ni.