Hnahthial district-ah ILP dan vawi 3 bawhchhiate thubuai siamsak dawn

Hnahthial district bawrhsap K Vanlalruati chuan, inner line permit (ILP) chungchangah hriattirna a chhuah a; ILP dan vawi thum bawhchhiate chu Bengal Eastern Frontier Regulation (BEFR), 1873 leh The Mizoram Inner Line Pass Guidelines, 2026-in a tarlan angin thubuai siamsak an nih dawn thu a tarlang.

Hnahthial Bawrhsap chuan, The Mizoram Inner Line Pass Guidelines, 2026-in a tarlan angin, lLP inkaihhruaina ṭhenkhat tihdanglam a nih thu a tarlang a, "Temporary ILP dam hun chhung (validity) hi temporary ILP siam ní aṭangin ni 15 thleng a ni. Khualzin (tourist)-te puala hman tur ILP dan thar siam a ni a, ni 30 chhung a dam ang a, renew theih a ni lo. Tourist hi a la châm zel dawn a nih chuan thla ruk atan regular ILP a dil ang a, a ram mi ngei (indigenous person)-in a sponsor ang," a ti.

Village council-te'n ILP sponsor-tu mimal chenna hmun finfiahna chu Form C hmangin an pe tur a nih thu tarlangin Bawrhsap chuan, "Hriattirnaah hian pek chhuah ní leh hmun hming a chuang tel ngei tur a ni," a ti a; VC-te'n ILP diltu leh sponsor-tute chhinchhiahna chipchiar chu Form F hmangin a vawng tur a nih thu a tarlang.

Hnahthial DC chuan, VC-te'n an huam chhunga ILP endik chungchangah thuneitute thu ngaichângin a ṭul angin an lo pui tur a nih thu a tarlang a; ILP security deposit la chhuak turte chuan pass thih aṭanga ni 90 chhungin lak tur a nih thu leh, hun tiam chhunga an la lo a nih chuan sorkarin a hrensak hlen dawn thu a tarlang bawk.