Minister-in Teachers' Day a hmanpui; MLA fund aṭangin zirtirtu 2 ruai dawn

Minister of state B Lalchhanzova chuan nimin khan a bial Aizawl East-II chhunga KVM High School-ah Zirtirtute Ní (Teachers' Day) a hmanpui a; KVM H/S-a zirtirtu an indaih lohna phuhrûk nan MLA fund aṭangin zirtirtu pahnih a rawih tur thu a sawi.

B Lalchhanzova chuan, KVM H/S-a zirtirtu indaih lohna phuhru tura Chhinga Veng Ṭhalai Pawl, Chhinga Veng Local Council leh School Management Committee ngenna chu chhángin, sikulin ṭha taka zirna a kalpui theih nan MLA fund aṭangin zirtirtu pahnih a rawih tur thu a sawi a ni.

Zirtirtute chu ram leh hnam tana hna ropui tak thawktu an nih thu sawiin Minister chuan, "Zirtirtute hna hi Pathian rawngbawlna pawimawh tak a ni. Naupangte'n an hun tam zawk an hmanna chu sikul a ni a, an hma hun atan nun an chherna hmun pawimawh tak a nih avangin zirtirtu dinhmun hi a zahawmin a pawimawh em em a ni," a ti a, ṭhahnemngai takin thawk zel turin zirtirtute a chah.

B Lalchhanzova chuan, naupangte chu mahni inrintawkna nen an zir lai hmachhawn turin a fuih a, "Lehkha zir nasat lutuk a awm thei lo a, zir nasat hi hlawhtlinna kawng pawimawh a ni," a ti.

Inkhawmah hian KVM H/S headmaster Robert Lalngaihawma pawhin thu a sawi a ni.