Chhiatna laka inveng turin mipui chah

Kolasib District Disaster Management Authority (DDMA) chairman H Dolianbuaia, bawrhsap chuan, tun hnaia ruahsur nasa vanga hmun hrang hranga leimin leh tuilian a awm avangin chhiatna thleng thei laka mipui himna tur hriattirna a tichhuak a; mahni in leh a velah leimin hlauhawm a awm leh awm loh uluk taka thlitlai reng turin mipui a chah.

Bawrhsap chuan, ruahtui tlak nasat vanga harsatna tâwk an awm lohna tura fimkhurna tur tarlangin, "Mahni in leh a velah leimin hlauhawm a awm em tih uluk taka thlitlai reng tur a ni. Hmun hrang hrangah leimin vangin kawng dan chah a awm ṭhin a, lirthei leh mihring tan chhiatna thleng thei a nih bawk avangin a ṭul tàwp (emergency)-ah lo chuan zin chhuah loh tur a ni," a ti.

Ruahsur nasa vangin lui a lian nasa tih tarlangin DC chuan, "Tuia chetsualna a thlen loh nan lui leh lui kam hnaihah kal loh tur a ni," a ti. Khuarel chhiatna vanga harsatna neite chuan an awmna biala zonal officer hnenah emaw, DC pisaa District Emergency Operations Centre toll-free number 1077-ah emaw, phone number 9774131593-ah hriattir turin a chah a ni.