Tleirawl thattua puh Denghmingthanga man a nih leh hnuah jail-ah dah luh a ni

Mualṭhuam North tleirawl H Lalramdinpuii (15) thattua puh Denghmingthanga (20), Mualṭhuam North chu September 1, 2026 zana a tlanbo hnuah September 3, Ningani tlai khan Vanhne rama thlâmah man a ni a, judicial custody (jail)-ah dah luh a ni.

Denghmingthanga hi H Lalramdinpuii thah thubuaiah August 20, 2026 khan man niin, Lunglei District Jail-ah dah a ni a; August 31, 2026 chhun dar 12 velah police-te'n thu zawhfiah turin Lunglei District Court phalnain jail aṭang hian an la chhuak a, darkar 72 chhung an kawl phalsak an ni.

Police-te'n an kawl laiin September 1, 2026 zanlai pelh hnu khan Denghmingthanga hi Lunglei Police Station-a lockup aṭangin a tlan chhuak. A tlanbo tih hriat a nih veleh police-te bakah, Lunglei leh a chhehvela YMA branch hrang hrang te, local council leh VDP unit hrang hrangte'n an zawng nghal.

Mizoram Police-a IGP (Hqrs) H Ramthlengliana chuan thuchhuah siamin, Denghmingthanga chu September 1 aṭang khan chhun zan zawmin zawn a ni a; CCTV-a a lan danin, Rahsi Veng lamah a kal nia hriat a nih avangin Rahsi Veng, Venghlun, Sazaikawn, Vanhne khua leh Ṭhuampui khaw dai, Hmawngva lui leh Tlawng lui kam thlengin zawn a ni.

IGP tarlan danin, September 3, Ningani tlai dar 4:30 khan Lunglei SDPO kaihhruai police leh VDP member eng emaw zat chuan Vanhne leh Ṭhuampui inkar, Vanhne rama thlâm pakhatah Denghmingthanga chu hmuin, an man. A hriselna dinhmun Lungleia endik a nih hnuah Judicial Magistrate hmaah hruai a ni a, District Jail-ah dah luh nghal a ni.

Police-te chuan, Denghmingthanga zawnnaa thawhpuitu khawtlang mipui leh tlawmngai pawlte chungah lawmthu an sawi a; thu belhchian dâwl lo thehdarh lo turin mipui an ngen bawk.