Election hotute'n Delete Kohhran an tlawh

Mizoram chief electoral officer (CEO) Garima Gupta, joint CEO Ethel Rothangpuii leh official dangte chuan September 3, Ningani khan Champhai Zotlanga electoral roll-a inziak lut duh lo Delete Kohhran mite a tlawh a, electoral roll-a inziah luh loh chhan an zawtfiah.

CEO Garima Gupta hian Delete Kohhran mite kâwmin, Electoral Roll Special Intensive Revision (SIR) 2026 neih mekah electoral roll-a an inziah luh duh loh chhan a zâwt a ni. Delete Kohhran hruaitute chuan, an sakhuana nen a inrem loh vangin electoral roll-ah chuan an duhthu ngeia awm lo an nih thu an lo hrilh.

Delete Kohhran tlawhnaah hian Champhaia election officer Ngulzaṭhuama leh Champhai South assistant electoral registration officer Lalchhuanawma Ralte te pawh an kal a ni.

Mizoram CEO hian September 3 vek khan Champhai DC conference hall-ah Champhai district election officer (DEO) Mohammad Aaquib leh SIR 2026-a mawhphurhna hrang hrang nei - electoral registration officer (ERO), AERO, political party, MJA leh tlawmngai pawl aiawhte a kâwm.

Garima Gupta chuan, Champhai district chu Mizorama district zingah SIR 2026-a che ṭha ber pawl an nih thu leh lawmawm a tih thu a sawi. Champhai DEO Mohammad Aaquib pawhin SIR hmâwr bâwk a ni dawn ta chu thawktute inpekna vang liau liau a nih thu a sawi a, Champhai district-a SIR kalpui dan a sawifiah.

July 7, 2026-a SIR 2026 Draft Electoral Roll tlangzarhah Champhai district-ah voter 56,412 an awm a; Champhai South bialah voter 24,106, Champhai North-ah voter 19,566 leh East Tuipuiah voter 15,440 an awm. SIR kalpui hmain voter 58,846 an awm a, SIR Draft Roll-ah voter 2,434-in an tlahniam a ni.