Police Station aṭanga tlanbo awm vangin police pakhat suspend a ni

H Lalramdinpuii (15), Mualṭhuam North thattua puh Denghmingthanga (20), Mualṭhuam North, Lunglei Police Station aṭanga a tlanbo zana lockup vengtu police, Naik T Zonunfela chu chawlh lailawktir (suspend) a ni.

Thu dawn danin, suspend tak T Zonunfela hi 2nd MAP mi leh sa a ni a; Denghmingthanga a tlanbo zana Lunglei PS-a duty dangte erawh chu suspend ṭulna awma hriat a nih loh vangin an chungah action lak a ni lo thung.

Hetihlai hian, Mizoram Police-a DIG (Southern Range) chuan chawlh a lak avangin DIG (Eastern Range) C Lalnunmawia chuan Southern Range DIG mawhphurhna a la tel rih nia thu dawn a ni bawk.