MizoTaxi app-ah lirthei 1,549 ziak lut; Inziah luh hun Sept 30 thleng pawtsei

State Transport Authority (STA) chuan thuchhuah siamin, MizoTaxi application hmang tura lirthei inziah luh theih hun chu September 30, 2026 thleng pawhsei leh a nih thu an tarlang. MizoTaxi-ah hian lithei 1,549 inziak lut tawh.

STA chuan, Mizorama four wheeler taxi, two wheeler taxi leh auto rickshaw-a chuang ṭhinte'n sorkarin a bituk chuan/hman man (approved rate) dik tak an chawi theih nan Aizawl bikah MizoTaxi app hman mek a nih thu leh, sorkar ruahmanna chu lirthei neitute leh mipuiin ṭangkai taka an hman beisei a nih thu an tarlang.

MizoTaxi app-ah lirthei 1,549 an inziak lut tawh tih tarlangin STA chuan, "MizoTaxi sticker belin Aizawl khawpuiah an service mek. Anni ho hi document clear vek an nih bakah, a khalhtute pawh fel taka register an ni a, mipui tan pawh anni ho hman hi a him a ni," an ti.

MizoTaxi app-a lirthei inziak lutte'n mipui mamawh an la phuhru zo lo tih sawiin STA chuan, "Hetiang a nih avang hian registered lirtheite chu mipui mamawh phuhru turin online reng tur leh a tam thei ang ber tlan turin ngen leh hriattir an ni a, sorkarin hun tam zawk an tlan theihna atan hma a la mek," an ti a; tun aṭanga rei lo teah thuthar neih an inbeisei thu an tarlang.

STA chuan, lirthei inziak lut an la tlem deuh avangin trip cancel a tam rih deuh tih sawiin, mipui hriatthiamna an ngen a, "Sorkarin permit pek belh loa he online cab booking system hi kalpui a tum hram hram vang a ni a, inziah luh theih hun chu September 30, 2026 thleng pawhsei leh a ni," an ti.

September 30 thlenga hun hawn belh chhunga inziak lut vek turin STA chuan Aizawla auto rickshaw, two wheeler taxi leh four wheeler taxi te an ngen. Registration hi MizoTaxi Office, Transport Complex, Chaltlangah emaw, online-in emaw tih theih a ni a, lirthei document fel kim lo chu ziah luh theih a ni lo.