Nature Conservator cum Eco-Tourism Guide certificate course training hawng

Mizoram Pollution Control Board (MPCB) hnuaia Mizoram EIACP Hub leh Tourism department chuan September 3, Ningani khan Directorate of Economics and Statistics conference hall-ah Green Skill Development Programme (GSDP) 2026-27 hnuaiah 'Nature Conservator cum Eco-Tourism Guide' certificate course training an buatsaih.

Training hi ni 53 awh tur niin, trainee mi 20 an tel a, a hawnna inkhawm hi MPCB-a scientist-B C Malsawmzuali'n a kaihruai. Tourism deputy director Rachel Lalrinhlui leh MPCB chairman Liankima Lailung ten thu an sawi a, EIACP Hub programme officer Benjamin Lalnunsanga Colney-in training programme a sawifiah.

Liankima Lailung chuan, GSDP programme chu khawvel changkanna leh tunlaina chak tak vanga harsatna awm theite sutkianna atan a pawimawh thu a saw a, "Environment humhalh chungchangah training leh certification nei professional an tam loh avangin eco-tourism hmasawnna nen training professional tak neih a pawimawh hle a ni," a ti.

Rachel Lalrinhlui chuan, Mizoramah khualzin an pun chak em avangin tourism chu environment humhalhna nen kalpui a ngaih thu a sawi a; trainee-te chu eizawnna atan thiamna (skill) thar zir tur ringawt ni loin, tourism ambassador anga che tur an nih thu a hrilh.