RIPANS-in zirlai chhuak turte an thlah

Regional Institute of Paramedical and Nursing Sciences (RIPANS) chuan September 3, Ningani khan an auditorium-ah zirlai chhuak turte thlahna '26th Graduation Ceremony' an hmang a, master degree leh diploma course zir zo mi 276 hnenah certificate hlan a ni. He hun hi Health minister Lalrinpuii'n a hmanpui.

Health Minister chuan, RIPANS chu hmarchhak state pariat aṭanga zirlaite kal khawmna a nih avangin hnam inpumkhatna hmun a nih thu a sawi a, "Hnam ziarâng hrang hrang inzir tawnna, inpawh tawnna hmun pawimawh a ni," a ti a; zirlaite chu hnam inkungkaihna ṭha an neih tawh chhawm nung zel turin a chah.

Zirnaa hlawhtlin ringawt chu hlawhtlinna tluantling a nih loh thu sawiin Lalrinpuii chuan, "Nungchang mawi, hawihhâwmna, rinawmna leh inpekna thûk tak neih a ṭul a, khawi hmunah pawh ṭha taka kan hmaa tla mawhphurhna hlen chhuak thei turin mi rintlak nih a pawimawh," a ti.

Graduation Ceremony-ah hian RIPANS director Dr Sanjay D Sawat pawhin thu a sawi a ni.

RIPANS hi North Eastern Council-in March 30, 1995-a a din a ni a, April 1, 2007 khan Ministry of Health and Family Welfare kutah a hlan. Tunah hian bachelor degree-ah nursing, pharmacy, medical laboratory science, optometry, radio imaging technology, physiotherapy leh nutrition & dietetics zirnate a awm a; course ṭhenkhatah master degree leh PhD zirna a awm bawk.