Mizoram Chief Secretary Conclave buatsaih

Mizoram sorkar chuan September 5, Inrinni tlai khan Aijal Club-ah 'Learning from the Past with a Resilient Future' hmangin Mizoram Chief Secretary Conclave an buatsaih a, chief minister Lalduhoma khuallian a ni.

Intawhkhawmnaah hian Mizoram chief secretary lo ni tawh - M Lalmanzuala, Vanhela Pachuau, Lalnunmawia Chuaungo leh Dr Renu Sharma te an tel thei a; Mizoram chief secretary ni tawh la dam zinga upa ber Lalkhama pawh tel tum mah se, taksa nawm lohna avangin a inhnûkdâwk. Mi dangte chu chhungkaw thil leh hriselna ṭhat loh vanga kal thei lo an ni.

Mizoram chief secretary ni tawh, la dam zingah tel thei lo mi panga an awm a, chu'ngte chu Lalkhama, F Pahnuna, Lalfak Zuala, Haukhum Hauzel leh L Tochhong te an ni. Mi pangate thuchah (message) chu chief secretary Khilli Ram Meena-a'n a chhiar chhuak.

Inkhawma tel M Lalmanzuala, Vanhela Pachuau, Lalnunmawia Chuaungo leh Dr Renu Sharma ten chief secretary an nih laia an thil tawnte leh harsatna leh chona an paltlang dante an sawi a, officer-te fuihna thu an sawi nghal.

Home secretary Vanlalmawia leh Planning secretary David Lalthantluanga ten Mizoram sorkar hmalakna te, state leh district-a sorkar inrelbawlna kalpui dante an sawi a; chief secretary ni tawhte nen sawihona leh zawhna leh chhanna hun hman a ni bawk. Mizoram sorkara secretary, bawrhsap leh IAS officer AGMUT cadre Mizorama awm mekte an tel.

Mizoram hian union territory hun aṭanga tun thlengin chief secretary 18 a nei tawh a, chu'ng zinga 11 chu Mizo an ni. Lalkhama chu UT lai leh state nih hnuah chief secretary ni kawp a nih bakah, ṭum thum chief secretary a ni a; CS ni tawh zingah hmeichhia pahnih - L Tochhong leh Dr Renu Sharma te an awm a ni.