Kum 2047-ah India GDP-ah 1% thawh ve kan tum - CM

Chief minister Lalduhoma chuan, kum 2047-ah chuan India ram Gross Domestic Product (GDP)-ah zaa pakhat (1%) thawh ve theih an tum thu leh, chumi tur chuan hma an lak thu a sawi.

September 5, Inrinnia Aijal Club-a 'Mizoram Chief Secretary Conclave' a hmanpuinaah Chief Minister chuan, economy chu chakna neih sa aṭanga ṭhang tur a nih thu a sawi a, "India GDP-ah 1% tal chu kum 2047-ah chuan thawh ve theih ngei kan tum. Hei hi sorkar pakhat emaw, chhuan khat emaw chauha tih theih a ni lo a; sorkar hrang hrang, institution hrang hrang leh sorkar hnathawk chhuan hrang hrangte'n tumna kan neih a ngai," a ti.

Conclave buatsaih chhan sawiin Lalduhoma chuan, "Chief secretary lo ni tawhte'n Mizoram hmasawnna tura an ngaihtuahna, an thâ leh zung nasa taka an lo sên tawh avanga chawimawina chauh ni loin, an tawnhriat aṭanga finna an chhar chhuahte hmanga tuna thawk mek officer-te fuihna leh finchhuahna hun a ni," a ti a; chief secretary lo ni tawhte hun lai leh tun hun chu dang mah se, sorkar hnathawkte thawh chhan 'mipui rawngbawl hna' erawh a la danglam loh thu a sawi.

Lalduhoma chuan, inrêlbâwlna ṭha leh sorkar ṭha nei turin remruat thiamna leh taimakna bakah, ram hmangaihna leh inpumpekna nena mipui rawngbawl a ṭul thu a sawi a, "Hmasawn zel turin kawng thui tak zawh tur kan la nei. Ziak leh chhiar thiamah India ram hmahruaitu kan nihna te, khawtlang leh mipui inpumkhatna leh thawhhona ṭha kan neihte hian kawng hrang hranga hmasawnna tur hmabak kan neihte hlen chhuak turin nasa takin min ṭanpui dawn a ni," a ti.

Chief Minister chuan, Mizoram sorkarin hmalakna a neih mek - Handholding Scheme, Project Monitoring Committee, Resource Mobilisation Committee, e-Office, grievance redressal leh digital land administration an kalpui dante a sawi a; ram hmasawnna leh mipui khawsak dinhmun chawi kâng tura hna an thawhnaah theihtawp chhuah turin kal khawmte a fuih a ni.