Lawngtlaiah raltlan in luahtir remti tawh lo

August 31, 2026-a Lawngtlai Bawrhsap kaihhruaia thuneitute ṭhutkhawmin an rêl angin, September 2026 thla tìr aṭang khan Lawngtlai khawpuiah raltlan leh ramdangmi ten in an luah an remti tawh lo.

August 31, 2026-a Lawngtlai DC hoa dan leh thupek kenkawh chungchang thlira ṭhukhawm chuan, ramdangmi leh raltlan chungchang an ngaihtuah a; ram mipui himna leh dan ṭha taka zawm a nih theih nan ramdangmi leh raltlante chu Lawngtlai khawpui chhungah in an luah remtih loh nise, tiin an rel. Rorel hi DC, VC, Young Lai Association leh police ṭanghoin an bawhzui tura tih a ni.

Lawngtlaia veng tinah ramdangmi leh raltlan lut leh chhuak chhinchhiahna mumal tak neih ṭha an ti a, raltlante zingah inhlawhfa an awm ṭhin chungchangah, inhlawh duhte chu an dinhmun ngun taka thlir chungin khawtlang hruaitute'n hnathawh phalna (work permit) pe chhuak ṭhin se, an ti.

Mizoram sorkarin a chhinchhiah danin, Lawngtlai district-ah hian raltlan 7,425 an awm mek a; Myanmar aṭanga lut mi 6,064 leh Bangladesh aṭanga lut mi 1,361 an ni.