KHAWTHLIR

Bawrhsap hlui thi

Aizawl bawrhsap hlui Vanengmawia, IAS (Rtd) w/o Liankimi, Tuikhuahtlang chu nimin zing 3:05 khan a thi a, nimin vek khan vui a ni. Kum 76 mi Vanengmawia hi MCS aṭanga IAS-a kai a ni a, Aizawl bawrhsap a nih tawh bakah, Mizoram sorkarah hna pawimawh tak tak a thawk a, a pension hnuah MPSC chairman a ni tawh bawk. Rawngbawlna lamah, KṬP-ah Mission Veng Branch leh Bialah hruaitu hlun a ni a, Tuikhuahtlang kohhran upa a ni bawk.

Meizial man

Assam Rifles leh Mizoram Police chuan September 4, 2026 khan Zuangtuia kudam pakhat an endik a, ram dang meizial, dan loa lak luh cheng vbc 15.29 hùa chhût an man. Foreign cigarette an mante chu Oris báwmpui (master box) 182, Mond báwmpui 252, Win báwmpui 33, Patron báwmpui 130 leh Esse Lights báwmpui 40 a ni a; a vaiin zial tlâwn 63,70,000 vel a ni. Meizial kaihhnawihah hian mipa pakhat an man tel bawk.

Minister-in pe

Minister of state B Lalchhanzova chuan September 5, Inrinni khan a bial Aizawl East II-a Dawrpui Badminton Club hnenah power generator (6.5 KVA) leh Chhinga Veng Table Tenis Club hnenah TT board leh carpet a pe. B Lalchhanzova chuan, Dawrpui leh Chhinga Veng ten ṭhalai leh upa deuh tawhte tana taksa sawizawina tur club an nei chu ṭha a tih chu a sawi a, "Infiamna leh taksa sawizawi hi taksa hriselna atan bakah, ṭhalaite nunkawng ṭha zawka hruaitu hmanraw pawimawh a ni," a ti.

Tla hlum

Nimin khan Hasima (18), Sribhumi (Karimganj) district chu hna a thawhna Maubawk West Presbyterian Biak-In bula luikawrah a tla a, damdawi-in panpui ni mah se, a hliam tuar loin a thi. Hasima hi biak-in sain a inhlawh a ni. Hasima ruang hi endik a nih hnuah an khua panpui tum a ni.

Police-in zu man

Vairengte Police Check Gate-a duty-te chuan an thu dawn bawhzuiin September 4, 2026 khan truck NL-03 AA-7879 aṭangin sapzu (Royal Stag) báwm (case) 30 an man a, truck-a chuang hnam dang pahnih an man nghal bawk.