STA-in mihring phur sumdawnna lirtheite an intiamna hre turin a chah

State Transport Authority (STA) chuan hriattirna tichhuakin, mihring phûr sumdawnna lirthei neite chu permit an lak dawna sorkarin chuan/hman man a bituk (approved rate) zâwm tura an intiamna hre reng turin an chah a; rate bituk zâwm lote chu phone number - 0389-2316080, 8369729905 leh 9862142241-ah te hriattir turin mipui an ngen.

STA chuan, Mizorama mihring phur sumdawnna lirthei permit neite chu permit pek an nih dawnah sorkarin rate a bituk anga tlân tur leh tlân duh lohna nei lo turin an intiam vek tih a tarlang a, "Sorkar rate aia sang passenger-te aṭanga lak chingte an awm a, chhuanlam hrang hrang siama an huam chin (domain) chhungah pawh tlan duh lohna nei an awm ṭhin. Hei hian mipui tan harsatna hrang hrang a thlen a, hnam dang lakah kan hmai nasa takin a timâwk ṭhin," an ti.

Sorkar ruahmanna palzût chu tihtawp vat ṭula hriat a nih thu sawiin STA chuan, "Sorkar chuan approved rate ni loa tlan a remti lo. Passenger phur chi lirthei neitute pawh permit an lak chhuah dawna an intiamnate hre reng tura ngen leh hriattir an ni a, sorkar rate zâwm loa tlan luite man chhuah an nih chuan a vawi khatnaah an permit suspend a ni ang a, a vawi hnihnaah an permit cancel a ni ang," an ti. Sorkar rate bituk zâwm lote chu thuneitute hnenah hriattir turin mipui an ngen a ni.