A náwlpuiah aia upa zahna a la tlahniam lo - K Sapdanga

Mizoram Upa Pawl (MUP), Zarkawt Branch chuan nimin khan Zarkawt Community Hall-ah an kum 50-na, golden jubilee an lâwm a; an hun hmanpuitu bialtu MLA K Sapdanga, minister chuan, Mizo náwlpuiah aia upa zahna a la tlakhniam loh thu a sawi.

K Sapdanga chuan, Mizote'n hnam nun ze mawi tak - aia upate zah an neih thu a sawi a, "Upate zah thiam hi Mizo nun ze mawi sawifiahna langsar tak a ni. Tun hnaiah aia upa zahna a tlahniam ta deuha sawi a ni a, a náwlpuiah hi chuan a tlahniam lo. Chhungkaw inzirna dawng mumal lo mi tlemtê, aia upa zah nachang hre lo an awm a, chung chuan he hnam hi an tihmingchhe ṭhin," a ti.

Rualúte chu finna hnár an nih thu sawiin Sapdanga chuan, "Lehkhabu kan chhiar tam thei lo a ni mai thei, mahse, tawnhriat inchhêk khawm hi a hlu em em. Sapho chuan 'Old is gold' an ti a, kum a tam hian hlutna a pung tih hi hnam fing zawkte pawhin an pawm dan a ni," a ti a, upate chu zirna sikul hlu tak an nih thu a sawi.

K Sapdanga chuan MUP, Zarkawt Branch chu kum 1976 khan Zarkawt venga rualúte'n an din thu sawiin, "Ngaihtuahna thui tak neitu, ṭhangtharte leh he veng tana hmathlir thui tak neitute chu vawiinah hian kan chawimawi a, zahna hlan chungin an sûlhnu kan chhui zel ang. Tun aṭanga kum 50 a ral leh chuan he MUP Branch hian kum 100 tlin a lawm ang a, tuna keiniho hi chu mual kan liam vek tawh ang," a ti.

Mihring chu liam mah se, MUP chu ṭhangtharte'n an chhunzawm zel dawn tih sawiin Sapdanga chuan, "Chung mite tan chuan MUP dintute hlutzia a chiang leh zual ang a, vawiina golden jubilee meichher chhitute pawh hi kan hlu ve hle tawh ang," a ti a; MUP chu Mizo ram, hnam, sakhaw innghahna a nih thu a sawi.

Inkhawm hi Zarkawt MUP president R Biakhluna'n a kaihruai a, khuallianin jubilee souvenir a tlangzarh bakah, kum 80 chung lamte hnenah chawimawina thilpek an hlan. Tlaiah jubilee ruai an kilho a ni.