Mit pe turin mi 9,345 inziak lut tawh

Nimin khan mi dang tana a thlawna mit pek pawimawhzia inzirtirna hun, Eye Donation Fortnight vawi 41 hman ṭan a ni a, National Programme for Blindness & Visual Impairment huaihawtin Taxation auditorium-ah hawn a ni. Mizoramah thih hnua mit pe (donate) tura inziak lut mi 9,345 an awm tawh tih an tarlang.

Eye Donation Fortnight hawnna inkhawm hi NHM, Mizoram mission director Dr R Lalchhuanawma'n a kaihruai a, Health principal director Dr Lalthlengliani khuallian a ni. Dr Lalthlengliani chuan, thih hnuah mit darthlalang (cornea) pek theih a nih thu sawiin, "Mit pek chu Eye Bank-in rang takin mitthi awmna hmun aṭangin an la ṭhin a, Eye Bank-ah cornea hi dahṭhat theih a ni," a ti.

Dr R Lalchhuanawma sawi danin, Civil Hospital, Aizawlah July 31, 2008 khan Eye Bank hawn a ni a, hawn a nih aṭanga nimin thleng khan thih hnua mit pe tura inziak lut mi 9,345 an awm a; thih hnua mit pe tawh mi 632 an awm. Mi mit pek dawng tura mit thlak ngai inziak lut mi 400 an awm tawh bawk.

Mizoramah eye donation hmangin September 25, 2009 khan a vawi khatna atan Aizawl Civil Hospital-ah Sri Sankaradeva Nethralaya, Guwahati nen ṭang dunin mit thlak (corneal transplant) hmasa ber tih a ni a; tun thlenin eye transplant mi 99 tihsak an ni tawh a, koh nghak mek mi eng emaw zat an awm.

Civil Hospital, Aizawl bakah, Synod Hospital-ah mit an thlâk nual tawh a, Eye Care Hospital-ah pawh mit thlak ṭhin a ni. Kum 2026-27 bikah July thla thlengin mit darthlalang (cornea) 42 lak tawh niin, mi 23-te cornea thlak a ni tawh.

Eye Donation Fortnight hi sorkar laipui ruahman angin August 25 - September 8 chhung hman ṭhin a ni. Nimina Aizawla hmannaah hian Civil Hospital, Aizawla eye specialist Dr Zoremmawii'n Eye Bank hnathawh dan leh mit pek leh thlak dan a sawifiah a; Mizo Higher Secondary School leh MICE School zirlai 33 chu an thih hnua mit pe turin an inziak lut nghal.

Kum 2025-26 chhunga mit pe mi 67 chhungte hnenah chawimawina thuchei hlan a ni a; eye donation chungchanga auhla (slogan) inphuahsiak lawmman sem a nih bakah, eye donor-te hnenah lawmthu sawina hlan a ni bawk.

Mit donate phal, Eye Bank-a inziak lut duh mi 20 chin awmnaah chuan thawktute'n an pan chilh thei a, phone number 0389-2324564 (toll free)-ah biak theih a ni.