Buhfai a tam tâwk - Supply Dept.

Food, Civil Supplies & Consumer Affairs department chuan hriattirna tichhuakin, sorkarin mipui tan buhfai a chhêk tam tâwk tih a tarlang a; thlaphâng lo turin mipui a chah.

FCSCA chuan, tun hnai ruahsur nasain rél kawng a tihchhiat avangin Mizoramah bungraw châwk luh a khaihlak deuh tih a tarlang a, "Mi ṭhenkhatin buhfaiah harsatna tawh mai an hlau tih thuthang a awm a, department chuan tun dinhmunah buhfai a chhêk tam tâwk a ni tih mipuite kan hriattir a, buhfaiah thlaphânna tur a awm lo," an ti.

Supply department tarlan danin, September 4, 2026 dinhmun anga Mizorama buhfai chhêk zat chu - FCI kudam hrang hrangah quintal 1,95,345.10 leh Supply kudam hrang hrangah qtl 1,34,430.93 a ni a, a vaiin qtl 3,29,776.03 a ni. Tun dinhmuna FCSCA department-in thla khata ration buhfai a sem ṭhin chu qtl 97,000 vel a ni a, tuna buhfai chhêk sa hian thla thum mamawh aia tam a daih a ni.