KHAWTHLIR

MHIP jubilee lawm

MHIP, Vaivakawn Branch chuan nimin khan Vaivakawn Cultural Centre cum Auditorium-ah golden jubilee an lawm a, bialtu MLA Lalnghinglova Hmar, minister of state-in a hmanpui. Minister hian jubilee souvenir a tlangzarh a, jubilee puala mi harsa zawkte hnena hlan tur Vaivakawn MHIP hnenah a hlan bawk. Jubilee lawmna hi bialtgu AMC corporator Vanlalhruaia pawhin a hmanpui a ni.

Heroin hâl ral

Nimin khan Lunglei AP Tlanga Incinerator-ah Lunglei District Disposal Committee (DCC) chuan heroin gram 182.74 an hâl a, Rs 35,59,600 hû a ni. Ruihhlo hâlnaah hian Lunglei SP Shivam Siddharth, SDO (Sadar), Excise & Narcotics Assistant Commissioner leh Lunglei SDPO te pawh an tel.

Teachers' Day MLA hoin hmang

Kulikawna sorkar sikul - primary school, middle school leh high school te chuan nimin khan a huhoin Kulikawn YMA Hall-ah Teachers' Day an hmang a, bialtu MLA Lalchhuanthanga'n a hmanpui. MLA chuan zirlaite chu sorkar hna ngawr ngawr thawh an tum loh nan zirtirtute'n an kaihhruai a ṭul thu a sawi a, "An theihna hmanga eizawnna an neih theih nana theihtawp chhuaha kan tanpui a ngai a ni tih hi zirtirtute'n i hre thar zel ang u," a ti.

CSR sum sawiho

Lawngtlai DC Donny Lalruatsanga hoin nimin khan sorkar hotu te, NHIDCL, HDFC, SBI, MCAB leh MRB hotuten corporate social responsibility (CSR) hmanga hmalakna turte an sawiho. NHIDCL chuan CSR kaltlangin Rs 15,00,000 thleng pek an inhuam thu an sawi a, SBI chuan CYLA-in ambulance an dil chu an bawhzui mek thu an sawi. HDFC, MCAB leh MRB te pawhin ruahmanna felfai tak a awm hunah Head Office lama an thehluh tur thu an sawi bawk.

Essay inziahsiak

Kolasib District Research Officer chuan Mizoram District Transformation Programme 2025-26 hnuaia 'My District My Vision for 2047' pualin essay inziahsiak an buat-saih a, nimin khan DC conference hall-ah result puan a ni. Intihsiakah hian R Laltlanmawii, Kolasib Ṭumpui chu pakhatna a ni.