Tui pump-na tihsan hna 40% zo tawh; Tui sem khaihlak hrethiam turin mipui ngen

Tuilianin Aizawl mipui châwmtu Greater Aizawl Water Supply Scheme (GAWSS) Phase I-a tui pump-na khâwl awmna a chîm ṭhin avangin pump khawl awmna hmun tihsan hna thawh mek a ni a, hna 40% vel zawh a ni tawh. PHE minister Prof. Lalnilawma chuan, hna thawh a nih avanga tui sem a khaihlak deuh a nih pawhin, hrethiam turin mipui a ngen.

Vanglaini palai zawhna chhangin Prof. Lalnilawma chuan, GAWSS Phase I-a tui pump khawl chu tuilianin a chîm phak loh turin May 30, 2026 aṭang khan a awmna hmun tihsan hna thawh a nih thu a sawi a, "Hna 40% vel kan zo tawh a, tun hnaiah truck driver-te'n Silchar-ah kawng an dan avangin bungraw ṭhenkhat - balu leh cement ṭhate a khaihlak deuh a, kawng chhia vangin rawra pawh duh angin kan nei thei lo. Chutihrualin, harsatna dang kan neih lêm loh chuan a tira kan beisei thla 6-9 chhungin kan zo hman ang," a ti.

PHE Minister chuan, GAWSS Phase-I aṭangin tui pump theih a nih rih loh avangin Aizawlah tui sem a pangngai thei rih lo tih a sawi a; hna thawh zawh a nih hunah chuan tuilian vanga tui pump theih loh a awm tawh loh an beisei thu sawiin, mipui tana an hmalaknate ngaichâng a, hrethiam turin mipui a ngen.

Aizawl mipui hnena PHE-in tui a pek dan chu hun pangngaiah chuan mi pakhat tan litre 3,500 target a nih laiin, tunah chuan litre 2,500-ah a tlahniam tih sawiin Prof. Lalnilawma chuan, "Ni 10 dana sem tura kan tih pawh tui nú leh electric khaihlak ṭhin vangin thla khatah vawi hnih sem chhuah zawh loh chângte kan nei. Fûr lai a nih avangin harsatna lian lutuk a la awm lo niin kan hria a, tui ren zel turin mi tin kan ngen nawn a ni," a ti.

Prof. Lalnilawma chuan, tun hnaiah Chawnpui vengah leimin vangin PHE pipe a chhiat thu leh Chawnpui aṭanga thlang lam zawngah tui sem a khaihlak thu sawiin, "August 29 leh 31-ah khan Chawnpuia bazar sak mekna leh a bulah lei a min a, kan tui pipe metre 102-a sei a tichhia a, theihtawp chhuaha thawktute'n an thawhna a zarah kar khat chhungin kan siam ṭha," a ti a, tunah chuan a pangngaiin tui an pek leh tawh thu a sawi.

PHE Minister chuan, Chawnpuia tui pipe kaltlangin Tanhril, Mizoram University, Central Jail, Luangmual, Phunchawng leh Rangva­muala consumer 13,000 vel tui pek a nih thu sawiin, "Darkar khatah tui litre nuai 7-8 pek rengna a ni a, kar khat chhung vel tui kan pe thei lo a, hrehawm kan ti. Pipe chhia thlakna tur hi a hrana chah chuan thla 6 vel nghah a ngai a, mipui mamawhna a san avangin nakina rulh leh turin kan division danga pipe 17 kan pûk a ni," a ti. Mipuiin ṭha taka tui an dawn theih nan PHE chuan theihtawp an chhuah zel dawn tih a sawi bawk.