Zirlaite zaipawl hmangin an intihsiak

Mizoram Independent School Association (MISA) chuan Inter-School Event a buatsaih mekah nimin khan Vanapa Hall-ah high school leh higher secondary school zirlaite zaipawla inelna, Gospel Choir Competition an buatsaih.

Choir Competition-ah hian sikul 18 aṭangin zaipawl an tel a; zaipawla sûlhnu leh tawnhriat nei ṭha mi pathum - Benjamin Pazawna, Malsawmtluanga leh ElBethela ten an endik a ni.

Result puan nghal a ni a; Zaipawl intihsiakah hian Ephraim Higher Secondary School pakhatna niin, pahnihna chu St Joseph Higher Secondary School leh pathumna chu Aizawl Christian Academy an ni. Lawmmanin pawisa leh nomawi a keng.

Home Missions School, Gospel Centenary School, St James School, Mount Carmel School, CLS Academy, Neuhof English Medium leh Living Water School ten consolation prize an dawng bawk.

MISA-in Inter-School Event an buatsaihah hian September 7 khan pawl 6-8 zirlaite tan Creative Writing Competition (poetry 7 story writing) buatsaih niin, sikul 37 aṭangin zirlai 495 an tel. September 11, 2026 khian Chanmari YMA Hall-ah middle school (pawl 6-8) zirlaite tan Poetry Recital Competition an buatsaih leh dawn a, Event hmáwr bàwk nghal a ni ang.