KHAWTHLIR

Thisen pe

Aizawl West College NSS leh Red Ribbon Club chuan nimin khan blood donation camp an huaihawt a, Civil Hospital, Aizawl tan thisen unit 76 an pe a, petute mipa 55 leh hmeichhia 21 an ni. Champhai Sub-Headquarters YMA hnuaia Health & Sanitation hmalaknain September 7, Thawhlehni khan Hnahlan khaw mipuite'n Champhai District Hospital tan thisen unit 109 an pe bawk.

Literacy Day-ah tel

School Education minister Dr Vanlalthlana chu nimina New Delhi-a International Literacy Day hmannaah khualzahawm a ni. Literacy Day hmanna inkhawm hi Department of School Education & Literacy-in an buatsaih a ni.

MNF ṭhukhawm

Independence Puan Diamond Jubilee Celebration Committee chu nimin khan Aizawla Mizo Hnam Rûnah an chairman Dr R Lalthangliana, MNF senior vice president hoin an ṭhukhawm a; MNF-a haw rûnpui siam tur chungchang leh party hmachhawpte an ngaihtuah. Dr R Lalthangliana chuan, MNF-ah chuan Mizo zawng zawng an len vek thu leh, kum 2028 inthlanpuiah chak ngei turin an inbuatsaih mek thu a sawi.

EVC hman dan zir

Lunglei Chief Medical Officer conference hall-ah nimin khan hri danna (vaccine) vawn ṭhatna hmanrua electronic vaccine carrier (EVC) hman dan zirhona buatsaih a ni a; Lunglei district khawthlang lama lirthei kal harsatna leh luh theih lohna khua - Bunghmun RD Block, Lungsen RD Block leh Tlabung RD Block huam chhunga Health sub-centre 11 aṭangin thawktute an tel.

Hmanrua sem

Champhai district bawrhsap Mohammad Aaquib chuan nimin khan Rashtriya Vayoshri Yojana (AVY) scheme hnuaiah upa mi 180 hnenah hmanrua (assistive device) a hlan. Hmanruate hi District Social Welfare Office leh Artificial Limbs Manufacturing Corporation of India (ALIMCO) thawhhona hnuaiah sem a ni.