Sorkar hnathawkte hi danglamna thlentu tur in ni - Adviser to CM TBCa

Nimin khan Administrative Training Institute (ATI) Training Hall-ah Combined Civil Service officer thar 34 tana buatsaih Basic Foundation Training Course hawn a ni a; training hawngtu adviser to chief minister TBC Lalvenchhunga, MLA chuan, sorkar hnathawkte chu danglamna thlentu tur an nih thu a sawi.

Adviser to CM chuan, sorkar hnathawkte chu sorkar khawl nghet an nih thu sawiin, "Democracy-ah in pawimawh em em a, danglamna thlentu tur in ni. File in khawih pawhin 'file phêna mihring (nunna) awm' kha ngaihtuah thleng phak zel rawh u. Thlêmna hrang hrang in la tâwk dawn a, chutiang hunah chuan 'Dan chhungah a awm em?' tiin inzawt thin ula, dik ngam ang che u," a ti.

TBC Lalvenchhunga chuan, officer tharte chu an hma hun atan duhsakna hlanin, "Induhsakna vanga tling ni loin, in phu vanga tling in ni a, in chhuanawm. Officer-a tlin hi a tawpna ni loin, a bul ṭanna zawk a ni a, in ṭhutna tur office pawh nangmahni ta ni loin mipui ta a ni," a ti a; a lalna lai nuam tia, mawhphurhna an hlamchhiah si chuan officer hlawhchham an nih dawn thu a hrilh.

Officer zingah mahni ram hre chiang lo an awm ṭhin thu sawiin TBCa chuan, "Mahni thawhna ram hre chiang lo officer nih hi a zahthlak," a ti a; ram chhunga zin chhuak tam tur te, lui te, ram awm dan te, hnam hrang hrang chengte leh an eizawnnate chena hre chiang turin officer tharte a chah.

Adviser to CM chuan, department-centric official te, service-centric official-te vangin sorkarin harsatna a tâwk ṭhin tih sawiin, mipui dah pawimawh ber turin a chah a, "In career hi chu in thil tih, in result leh in thawh chhuah aṭanga teh ni rawh se, chu chu in hnûhmá tur a ni. Basic Foundation Training pawh hi service hrang hrangte inkara inpawhna leh thawhhona ṭha thlentu ni ngei rawh se," a ti.

ATI director Rita Lalnunmawii Pachuau pawhin thu sawiin, "Dan (rules) ringawt zir loin, hna thawhna hmuna hman ṭangkai tur soft skills ngaih pawimawh a ni dawn. Service hrang hrangte riak luta an training chuan inpawhna ṭha zawk a hring chhuak dawn a ni," a ti a; Combined Civil Service-a tlingte chu a ruala training vek theih dan tur an ngaihtuah mek thu a sawi.

Training hi October 30, 2026 thleng awh tur a ni a, officer tharte chu an riak lut dawn a ni.