Hnahthialah ULLAS Literacy Fortnight Rally

Kum 15 chin chung lamin ziak leh chhiar an thiam vek theihna tura sorkar laipui hmalakna, Understanding of Lifelong Learning for All in Society (ULLAS) pualin nimin zing khan Hnahthial Sub Divisional Education Officer (SDEO) pisa chuan kawngzawh, 'Rally for ULLAS Literacy Fortnight' an buatsaih a, zirlai za vel an tel.

Kawngzawh hi Hnahthial Bazar tualah ṭan a ni a, SDEO S Lalthanzuala'n thu sawiin, ULLAS chungchang a sawifiah. Chumi hnuah Bazar tual aṭanga HDVA Court thleng kawng zawh a ni a, kharna hun hman niin, Hnahthial IPRO F Lalrinfela'n thu a sawi.

S Lalthanzuala chuan, ULLAS-in a tum ber chu, India khua leh tui, kum 15 chin chung lam zawng zawng ziak leh chhiar thiamtir a nih thu sawiin, "Chumi a thlen theihna tur chuan zirlaite hi kan pawimawh. Mizoram hi fully literate state-ah puan ni tawh mah ila, a nihna takah chuan ziak leh chhiar thiam lo kan la awm nual a, ULLAS-in a tumte inhriattirna atan rally buatsaih a ni," a ti.

IPRO F Lalrinfela pawhin, zirlaite chu lehkha ziak leh chhiar mai bakah, digital & financial literacy lamah inchhiar zau a, upa zawkte pui ṭhin turin a chah a; an thiamnate chu mi dang hmuhsit nan ni lo, mi dang dâwm kân nana hman tum turin a fuih bawk.