Lawngtlaiah khawpui fai intihsiakna hawng

Lai Autonomous District Council (LADC) chief executive member C Lalsawmzuala chuan nimin khan Lawngtlai DC conference hall-ah Solid Waste Management (SWM) Rules 2026, Plastic Waste Management (PWM) Rules 2026 leh Mizoram Cleanliness Competition, 2026 te a hawng.

LADC CEM chuan, Lawngtlai khawpuiin faina leh thianghlimna lama hma a sawn theih nan infuih tharna leh zirhona buatsaih a ni chu ṭha a a tih thu sawiin, "Mizoram Cleanliness Competition-ah kan district hi dinhmun ṭha zawkah a awm ngei ka beisei a, faina leh thianghlimnaa hmasawn turin mumal leh awmze neia bawlhhlawh sâwngbâwl a pawimawh," a ti a; district administration leh LADC ten theihtawp an chhuah thu a sawi.

Solid Waste Management Rules, 2026 leh Plastic Waste Management Rules, 2026 chu ngaih pawimawh a ṭul thu sawiin CEM chuan, "Hei hian khawpui fai leh thianghlim zawkah min hlâng kai thei a, danin a phûtte zawm ṭhat a pawimawh. Mizoram Cleanliness Competition-ah dinhmun ṭha zawk chang turin kawng hrang hranga hmalak thiam a ṭul," a ti.

Inkhawm hi Lawngtlai bawrhsap Donny Lalruatsanga'n a kaihruai a; Solid Waste Management Rules leh Plastic Waste Management Rules chungchanga Supreme Court thuchhuah bawhzuia hmalak tawhnate leh hmachhawpte a tarlang.