Common Facility Centre kalpui dan tur rêl

Serchhip district bawrhsap Paul L Khuma kaihhruaiin nimin khan Zuangleng rama Common Facility Centre (CFC) kalpui dan tur rêl a ni.

Zuangleng CFC hi balhla aṭanga lehkha (paper), hrui (fibre), leiṭha leh balhla chips siamna tura din a ni a, NECTAR funded project niin, implementing agency chu APRINS, Guwahati an ni. Kum 99 chhung atan ram hawh (lease) niin, nikum 2025 khan in sak zawh a ni a, October 15, 2025 khan Chief Minister-in a hawng a, August 2026 khan khawl leh bungraw awm turte dah a ni.

Ṭhutkhawmah hian CFC-a thawk tur lak chungchang te, balhla kûng lak khawm leh kut hnathawktute inhlâwm khawm dan tur te, a man chungchang te, phurh kualna tur lirthei chungchang te, tui leh kawlphetha changtlung tak pek theih dan tur te, Project Management & Monitoring Committee din dan tur leh thawhhona ṭha zawk a awm theih dan turte sawiho a ni.

Serchhip Bawrhsap chuan, NECTAR leh APRINS hotute chu Serchhip district-a hmalakna (project) neih a nih dawn reng rengin a kaihhnawih department leh district hotute nen inràwn hmasak a, thawhhona ṭha neih a pawimawh thu a sawi a; ARPINS-te chu chak taka hma la tur leh Project Monitoring Team kaltlanga chak taka en zui reng an nih tur thu a hrilh.