Zûk leh hmuam chungchang zirho

Kolasib IPR conference hall-ah nimin khan Kolasib khawpuia sorkar primary school, middle school leh private school zirtirtute tan 'Workshop for School Teachers, Tobacco Free Education Institution (ToFEI) Guidelines & Tobacco Cessation' buatsaih a ni a; chief medical officer Dr RK Lalthlamuana'n a hmanpui.

Zirhonaah hian Kolasib district-a National Tobacco Control Programme consultant Dr Christine Chhuanmawii leh psychologist Emmanuel R Hmingthantluanga ten zirtirtu kal khawmte chu thil pawimawh hrang hrang an zirtir a ni.

Kolasib CMO Dr RK Lalthlamuana chuan, Global Adult Tobacco Survey-a tarlan danin, Mizo zingah vaihlo zûk leh hmuam ti an la tam hle tih a sawi a, "Vaihlo ṭhat loh zia hi naupangte aṭanga kan inzirtir a pawimawh a, sikul naupangte zûk leh hmuama an filhim theih nan zirtirtute'n theitawpa hma kan lak a ṭul," a ti. Vaihlo zuk leh hmuam lakah inthiar fihlim turin zirtirtute a chah bawk.