DMR Minister-in ruahsur vanga harsatna thlengah chî-âi lo turin mipui a chah

Disaster Managment & Rehabilitation (DMR) minister Prof. Lalnilawma chuan tun hnaia ruahsur nasa vanga chhiatna thlengah chî-âi mai lo turin mipui a chah a, harsatna tâwkte an awm chuan thuneitute hnena thlen thuai turin a ngen.

Prof. Lalnilawma chuan, harsatna tâwkte koh theihin DMR department-a thawkte an awm reng thu sawiin, "Tun hnaia ruahsur nasa vangin hmun hrang hrangah leimin leh kawng ping a awm a, heng harsatna tâwkte ṭanpui turin khua leh veng tinah zonal officer an awm. Heng bakah hian village/local level-ah Disaster Management Committee an awm bawk. Anni hnenah hian harsatna leh buaina tâwkte'n rang taka report ṭhin tur a ni," a ti.

Smart phone application hmanga mipuiin harsatna an thlen theihna tur DMR department-in Khuarel App an siam chu hmang ṭangkai tura mipui chahin Minister chuan, "A bik takin veng chhung leh khaw kar kawngah leiminin kawng a lo hnawh ping emaw, a dang a nih chuan Khuarel App hmang hian report thehluh theih a ni," a ti a; report a luh chuan zonal officer-te leh DC-te'n an lo hmu vat ang a, hmalak dan tur rang takin an ngaihtuah thei dawn tih a sawi.

PHE changtu ni bawk Prof. Lalnilawma chuan, tui sem chungchang sawiin, "Tun hnai ruahtui tam zualah Aizawl châwmtu, PHE department-in tui lakna atana a rin pui ber Aizawl GWSS Phase-III chu leiminin a hnawh ping a, tui pump theih a ni lo. Setlâk lam atanga gravity hmanga tui fim pump tura an lak luh ṭhin pawh Aizawl Western By-pass Road siam mek aṭanga leivûngin a tinu a, harsatna kan tâwk mek," a ti. Minister hian tuiah harsatna a awm a nih pawhin mipui hriatthiamna a ngen a ni.