Gauhati High Court judge atan Helen Dawngliani ruat a ni

Ministry of Law & Justice chuan Gauhati High Court additional judge atan Helen Dawngliani a ruat. Hemi chungchanga hriattirna hi September 8, Thawhlehni khan tihchhuah a ni a, a hun chhung chu kum hnih a ni.

Supreme Court Collegium chuan August 8, 2026 khan Gauhati High Court judge atana Helen Dawngliani rawtna a pawm tawh a, Ministry of Law & Justice chuan ruat a nihna notification a tichhuak ta a ni.

Mizo zingah Gauhati High Court judge-ah hian T Vaiphei, Michael Zothankhuma, Nelson Sailo leh Marli Vankung te an awm tawh a; T Vaiphei leh Marli Vankung te pension-in an chhuak tawh.

Helen Dawngliani hi BA (Hons) LLB a ni a, May 24, 2011 khan Mizoram Judicial Service a zawm a, Mizoram sorkarah Law & Judicial secretary leh Gauhati High Court-a registrar te pawh a lo chelh tawh a ni.